Ole Gunnar Solskjaer chuan an khelh hmabaka Tottenham Hotspur leh Manchester City te an hneh lo a nih chuan an ban thei tih a sawi.

Manchester United chu tun season chhungin an che fuh lo chho hle a, an khelh hnuhnun berah Pathianniah khan Old Trafford-ah Aston Villa nen 2-2 in an inhnehtawk a, Premier League season kal mekah Red Devils chu pakuanaah an awm mek a ni.

Tun hnaia beisei an phak loh em avangin manager Ole Gunnar Solskjaer dinhmun pawh a derthawng chho viau tawh niin an sawi a. Hetiang boruak karah hian Solskjaer pawhin a ban hun hi a hnai thei mai dawn nia a hriat thu a sawi chhuak.

Solskjaer hre chiangtu pakhat chuan, “Aston Villa nen an inkhelh zawh hnu khan Ole rilru a kal kual nasa hle a, player te hnenah an hmabak pahniha an che tha lo a nih chuan club thuneitute chuan an ban thei a ni tih a sawi chhuak hial a ni,” a ti.

“Manchester United an che fuh thei meuh lo a, chutiang karah an khelh leh hmasak berah Tottenham Hotspur an hmachhawn dawn a. Jose Mourinho a rawn kir leh chiah bawk nen, United tan chuan hmabak a ko ve hle a ni,” a ti bawk.

Norwegian boss dinhmun a derthawng hle a, hetiang karah Tottenham manager kal chhuak ta Mauricio Pochettino a lo awl remchan bawk avangin Solskjaer tan chuan awm a nuam lo lehzual dawn a ni.

United thuneitute chuan an player te hnenah an manager hlui Jose Mourinho chuan chak ngei a duh viau dawn tih an hrilh a. An ban tawh hnu a nih avangin a club enkawl thin, amah bantute hneh theih chu a thil tum lian tak a nih dawn avangin player te hnenah chuan theihtawp chhuah a tul zia an hrilh lawk nasa hle.

Hetiang boruak karah hian executive vice-chairman Ed Woodward chuan eng boruak pawh thleng se Ole Gunnar Solskjaer lamah a tang tlat dawn niin a sawi ve thung a ni.

Hre chiangtu chuan, “Ole hian player te hnenah Spurs nen an inkhelh hunah theihtawp chhuah turin a hrilh a. An boss hlui Jose chuan hneh theih ngei a tum viau dawn tih sawiin, a thil tum chu a tihpuitlin loh nan tan lo la vek turin a fuih a ni,” a ti.