Manchester United captain thar Harry Maguire

17th January 2020, 09:01PM

Harry Maguire chu Manchester United captain atan an ruat thar a, Ashley Young chuan Inter Milan a zawm dawn hnai tawh nia a lan avangin captain pawh hi an thlak phah a ni.

Nikum August thlaah khan Manchester United chuan England centre-back Harry Maguire hi £80 million in an lei a, Red Devils captain Ashley Young mawhphurhna chelh thin chu a chelh ve tawh dawn a ni.

Manchester United manager Ole Gunnar Solskjaer chuan an club captain thar hi a puangzar a ni.

Ole Gunnar Solskjaer chuan, “Harry hian captain ban hren hi a hreng ve ta fo a, tunah chuan a hren chhunzawm reng tawh dawn a ni,” a ti.

“A nihna takah chuan Harry hian a teammate te hi khelmual pawnah leh chhungah a kaihruai nasa hle a, a miziaa hruaitu nihna a keng tel tak mai hi ka fak hle a ni,” a ti bawk.

A sawi zelnaah, “Kan club a rawn zawm tirh atang khan amah hian hruaitu nihna tha tak a awm a ni tih ka hmu nghal a. Kan squad la naupang tak mai hi a rawn awm hnuah chuan nasa takin a kaihruai chho tawh,” a ti.

“Hetiang taka hruaitu nihna a ken tel avang hian captain ban hren pawh amah hian a hreng chho zel tawh dawn a ni,” tiin a sawi.

Kum riat leh a chanve zet Manchester United nen lo inzawm tawh Ashley Young chu Serie A club Inter Milan nen an inbe rem vek tawh a, Italian club hian €1.5 million (£1.3 million) in an lei dawn hnai tawh a ni.

2011 ah khan Aston Villa atangin Young chuan United a zawm a, hemi hnuah hian game 261 khel tawhin, hengah hian goal 19 chu a thun tawh a. Title lian tham pali a lakpui tawh a, heng zingah hian 2012-13 Premier League title pawh a tel a ni.

Copyright © inkhel.com 2024. All rights reserved.