03 Oct 2018 06:21

bakteaJr.

Mizo tlangval

Manchester United buaina ber hi enge ni?

Football ngainatute chuan kan hriat theuh angin tun hnaiah English club ropui ber leh hlawhtling bera chhal ngam Manchester United chu an che tha lo hle a, a zawnin game li chhung chu chak ni hmel an hmu tawh lova, zia lam an pan pawhin a lang lo. Scot manager ropui Sir Alex Ferguson-a’n kum 26 lai a enkawl hnuah kum 2013 khan Sir Alex hi a retire a, hemi hnu hian United-in ngai an awh thei tawh lo. Premier League title an la la leh lova, Champions League phei chu sawi ngai lovin, an khelh phak lo chang a awm ta zeuh zeuh zawk.

Tunah hian Porto, Chelsea, Real Madrid leh Inter Milan-te boss hlui Jose Mourinho chuan United hi enkawl mekin tun season hi Mourinho-a season thumna a ni. Mourinho hi a club awmna tawhna apiang deuh thawah hian a season thumnaah a tluang lo ziah a; Chelsea-ah tum hnih a awm chhung pawhin a season thumnaah a tluang lo ve ve a, chutiang bawkin Inter Milan leh Real Madrid-a a awmlai pawhin a season thumnaah a tluang lo bawk.

Tunah erawh Manchester United buaina hi Mourinho lam ni berin a lang tawh lova, mahse Mourinho puh theihna chen erawh a awm tho bawk a ni. Media lamin an tarlante hi a dik a nih ngai chuan Mourinho leh a naute thenkhat inkar boruak hi a thalo hle niin a lang a, a bikin Paul Pogba nen an inkar hi a khi nasa viau ni pawhin a lang. Mahse hemi hi Manchester United buai chhan ber niin a lang lova, United buai chhan ber nia lang zawk chu, player an lei fuh thei lo hi niin a lang.

United hotute lamin sum an ren tih dawnin a dik thei si lo; United hian Sir Alex chhuah hnuah sum an seng hnem tawh hle a, English club zingah a seng huai ber zinga mi an ni. A hunlaia footballer manto ber ni tura an lei Pogba lah France tana a khelh angin United tan a khel thei lo a ni ber a, season tantir lam phei kha chuan a khel chhe hle a, United legend Paul Scholes pawhin, “Tunah hian kum 40 chuang ka ni tawh a, mahse United tan hian khelmual chhungah Pogba aiin ka la tangkai zawk ang,” a ti hial.

United hi a bikin tun season-ah an insiamrem hleithei lo a ni ber a, an defence a chhia a, an team an inkhairual lo hle. Scholes bawk hian United defence hi lo sawisel tawhin, “United hian centre half rinrawla hmatlak pakhat mah an nei lo,” a lo ti tawh bawk. United hian centre back pali hman tur an nei a, heng zingah hian Eric Bailly leh Vicktor Lindelof chu Mourinho-a lei hi an ni a, lei fuh tih tur an ni lo ve ve. Lindelof phei hi chu Liverpool defender hlui Jamie Carragher chuan sawiselin, “Lindelof hi hetiang level sanga khel tlak a ni lo,” a lo ti tawh.

Kumin kumtirah United hian Alexis Sanchez chu Arsenal atangin an lalut a, Henrikh Mkhitaryan chu Arsenal lamah an kal tir thunga, an ti fuh chiah lo ni berin a lang. United a zawm hnuin Sanchez hian ngai a la awh lova, Mkhitryan zawk hi Arsenal tan a tangkai hle a, he indawrnaah hian Arsenal an hlawk zawk pawh a tih theih awm e. Sanchez hian Arsenal chhuahsan a duhthu a sawi atangin Manchester City an rawn lang vat a, City hian an lalut tawh mai dawn emaw tih laiin United-in an lalut ta daih a, pundit tam tak chuan chuan United hian City kha Sanchez hi lak khalh hrim hrim an duh niin an sawi nghe nghe.

United player lakluhte hi fuh tak an vang chho ta hle a, kumin nipui bazarah Fred bak player langsar lakluh an neilo. Fred hian huhang ngah angreng viau mahse, Premier League-ah eng a la ang lova, midfielder tha tak tia sawi theih pawh a la ni lova, midfielder tha ve pangai mai a ni rih a, ala insiamrem zel beisei phawt ang. United hian centre back an mamawh zia an hai lova, nipui bazar-ah pawh centre back tha tak tak dawr mahse, an lak tumten United hi an hnar zel. Leicester atangin English defender Harry Maguire lakluh an tum chu a tlawlh a, ani bakah hian Diego Godin leh Jerome Boateng-te pawhin tun nipui bazar lai khan United hi an hnar.

Season liamta khan United hi Premier League-ah pahnihna niin, an thenawm City chiah an pha lova, beisei sang viau mahse, hniam lam an pan ta zel zawk. Player an lalut fuh thei lo hi an tuar ni berin a lang a, thlasik bazarah pawh an chet nat viau a rinawm. United boss Mourinho hi mi tam takin an mawhpuh mek bawk a, media-te chuan Mourinho hi tun thla chhung ngeia ban a nih tur thu an sawi nasa hle.