Premier League inkhelah Manchester United chuan Old Trafford-ah Wolves an lo mikhuala, team hnihte hi goal awm lovin an inhnehtawk.
Manchester United hian khelh 25-ah point 35 an hlawhchhuak tawha, 6-naa awmin, Wolves hian 7-naah an awm ve thunga, anni pawh hian khelh 25-ah point 35 tho an hlawhchhuak tawh a ni.
Manchester United executive vice-chairman Ed Woodward chu Old Trafford-ah hian hmuh tur a awm lova, Woodward-a in hi United fan thenkhat te chuan tunkar khan an bei a nih kha.
Manchester United 0-0 Wolves
Player Ratings
Manchester United: De Gea 7, Wan-Bissaka 6, Lindelof 6, Maguire 7, Shaw 7, Fred 6, Pereira 5, Mata 6, Fernandes 7, James 6, Martial 5. Subs: Dalot 6, Lingard 6, Greenwood 6.
Wolves: Patricio 6, Saiss 6, Coady 6, Boly 6, Otto 6, Doherty 6, Neves 6, Moutinho 6, Diogo 6, Adama 6, Raul 7. Subs: Neto 7, Podence 7, Dendoncker 6.
Match report tawi
He inkhelah hian Manchester United-in tun kar maia Sporting Lisbon atanga an lei Bruno Fernandes chuan inkhel bul a tan nghala, Fernandes hi a khel chhe lem lo hle. Team hnihte an inkhelh hma hian an chunga awm Chelsea-te an inhnehtawka, Wolves emaw United emaw tan hian Chelsea hnaihna hun tha tak ni mahse chak zawk an awm tak loh avangin an inkar zau zawng a danglam ta lo.
First half-ah United player thar Fernandes chuan long shot chhe lutuk lo vawi hnih vel a nei a, Wolves lam tan Adama Traore a tangkai leh viaua, United fullback Luke Shaw tan buaipui tham a tling a tih theih awm e.
Second half-ah United an rawn khel tha chho viaua, inkhel pawh a hmuhnawm thawkhat viaua, mahse goal khung thei erawh an awm lo. Team hnihte chance an insiam ve ve a, goal khungna hun tha pawh nei thin mahse inkhelh chhung zawngin goal a lut lo.
40mins-ah Fernandes chuan box pawn deuh chiah atangin goal-ah ball a shoot a, Rui Patricio chuan a lo save a, Fernandes hian shoot nawn leh mahse goal a zawn tawh lo.
Second half tan tirah Jota chuan Lindelof a paltlanga, Wan-Bissaka leh Maguire te pawh paltlang leh mahse a shoot dawnah a tlawlhthlu a, a shoot chhiat phah hle.
Darkar khat khelh a nih hma chiahin yard 35 vela hla atangin Fernandes chuan goal-ah ball a shoot a, shoot chhe lo hle mahse Patricio chuan a lo save.
Darkar khat khelh a nihin Juan Mata chuan goal-ah ball a shoot ve leh, mahse Patricio bawk chuan a lo save. 69mins chho ah Traore chuan chak takin ball a khalha, Jimenez a pe, Jimenez hian goal-ah tha takin shoot mahse De Gea chuan a lo nam chhuak.
Inkhel tawp hma lawk injury time-ah Wan-Bissaka cross atangin United fullback Diogo Dalot chuan chance tha em em mai nei mahse a Dalot-a shot hian chhete in goal a zawn lo. Goal khung an awm theih loh avangin inkhel hi 0-0 in tihtawp a ni ta a ni.