Pathianni zanah Premier League 2018-19 season hmawr an bawk dawn ta a, Manchester City leh Liverpool te chu champion thei dinhmunah an ding ve ve a. An inkhelh hma chuan engmah sawi chian theih a la awm lo a, City an champion ta a nih chuan Sir Alex Ferguson chawlh hnua Premier League title humhim leh thei hmasa ber an ni ang a. Liverpool an champion a nih chuan kum 29 zet mai an lo tih theih tawh loh, Premier League title chu a vawi khatna atan an la ve tawh dawn a ni.

Tun season chhungin team pahnihte hi an che tha dun khawp mai a, tu zawk zawk pawh hi champion se, an phu ve ve a tih theih ang.

Brighton an hneh a nih chuan Manchester City chu an champion thei dawn a, point 98 an hmu ang a, season hnih chhungin point 198 zet an hmu tling thei dawn a. Anfield-a Wolves an hneh a nih chuan Liverpool chuan point 97 an hmu thei dawn a, Reds hi champion ni thei tur chuan an chak a, City an chak loh emaw, Brighton nen an inhnehtawk emaw a ngai ang.

August 2018: Liverpool chuan season bul an tan fuh hle a, a tir lam vawi thum inkhelhah vawi thum an chak thei a. Anfield-a Merseysider hoin 1-0 a Brighton an hneh niin Manchester City chuan Wolves khelmualah point 2 an hloh a. February thla hnuah Premier League away game an khelha an chak theih loh hmasak ber a ni.

Point 9 hmuh theihna tura point 7 hmuh theih chu thil chhe lem lo tak a nih rualin, Guardiola pawlte chuan September thla chu a chungnung pali huang pawn atangin an hmang tan a. Liverpool chuan point 9 an hmu a, Tottenham, Chelsea leh Watford te pawhin point 9 theuh an hmu bawk a. English league sang berah team pali in game thum chhunga 100% chak hmel an hmuh theih vawi thumna a ni.

A tir atang reng reng hian chet fuh viau a ngaih zia a lang chiang nghal hle a. September thla atangin Liverpool chu an che tha chho tan a, vawi 5 khelhah vawi 5 an chak thei a, hetiang hian an club din tirh atangin vawi thum chiah an la ti thei a. Hemi hnu hian an chak tluang lai chu tihtawpin a awm a, Carabao Cup ah Chelsea an hneh lo a. Manchester City ve thung chuan Oxford United an hmachhawn a, an la chak ve thung a. He inkhelah hian Phil Foden chuan City tana a goal hmasa ber a thun a, kum 18 leh ni 120 a upa a ni.

September thla tawpah Liverpool chuan Chelsea khelmualah point an hloh a, hetah chiah hian Premier League title kawltu Manchester City chuan hma an hruai ve theih phah a ni.

October thla a inher chhuak a, Manchester City leh Liverpool te chuan point inang an hmu a, an intlansiakna chu tih tak zetin an tan chho tak tak a. January 2018 leh April 2018 inkarah anni pahnih hi vawi thum ngawt an intawng hman a, boruak pawh a sang chho tan hle.

Tun hnaia an game khelh hnuhnun vawi 4 ah City chuan goal an chhuah lo tawh a, team pahnihte hian tun season chhungin vawi 20 chu an goal an venghim ve ve tawh a. Brazilian goalkeeper pahnih Ederson leh Alisson te chu tun season chhunga Golden Glove dawng thei tura beiseiawm pahnih an ni.

An tihsual avanga anmahni lama goal an luhtir pawh a tlem dun viau a, Manchester City chuan hetiang avang hian vawi 2 chu goal an chhuah tawh a, Liverpool chuan anmahni tihsual vangin vawi 4 chu goal an chhuah tawh bawk a. Chelsea leh Wolves te chuan anmahni tihsual vangin goal thum ve ve an chhuah tawh bawk.

Pep Guardiola pawlte chu ball possession lamah tun season chhungin an sang ber a, 67.91% record an nei a, Liverpool chu pathumnaah awmin, an chungah hian Chelsea chu an awm a. City chuan pass fuh an nei hnem ber a, vawi 25,784 zet hlawhtling takin ball an inpe a, anmahni hnaih bertu Chelsea aiin vawi 1000 chuang zetin pass an nei hnem a. Liverpool chu pathumnaah an awm a, vawi 23033 chu an in pass a ni.

Goal hmaah Manchester City chu a hlauhawm ber an ni a tih theih a, goal shot 232 an nei tawh a, hengah hian goal 91 chu an thun tling tawh a, Liverpool pawhin goal 87 chu an thun tling tawh bawk a, an pahnih hian goal 22 ve ve an chhuah tawh bawk.

Mohamed Salah chuan goal 22 a thun tawh bakah mi goal thun tur vawi 8 a siamsak tawh bawk a, goal kaihhnawih thilah vawi 30 a inhnamhnawih tling tawh a, Eden Hazard aiin a vawi khatin a chungnung hret a. Manchester City player pahnih - Sergio Aguero (vawi 28) leh Raheem Sterling (vawi 27) te chu an hnuaiah hian an awm a ni.