Manchester City chu club zingah kumina FIFA World Cup chhawr tangkai ber an ni a, FIFA in $209 million an sem kual turah City hian an dawng hnem ber dawn a ni.

FIFA chuan thuchhuah siamin Russia rama World Cup khel tura club hrang hrangin an player te an thawh dan azirin club te hnenah pawisa an pe dawn a. Hetianga pawisa an pek turah hian Manchester City chu club mala pawisa dawng hnem ber tur an ni a, $5 million an dawng ang.

City dawt chiahah hian Real Madrid awmin anni hian $4.81 million an dawng ang a, Tottenham Hotspur chu pathumnaah awmin $4.38 million an dawng dawn a. Barcelona chuan $4.14 million an dawng dawn a, palina niin, $3.89 million dawng tur Paris Saint-Germain chu panganaah an awm bawk.

English club te pawisa dawn tur belh khawm hi $37.41 million a ni a, Spanish club te pawisa dawn tur belh khawm chu $22.56 million niin, German club te dawn tur belh khawm chu $18.92 million a ni a, Italian club te dawn tur belh khawm chu $17.45 million a ni.

FIFA chuan club te’n World Cup khel tura an player te an kaltir hian ni khatah player pakhat tan $8,530 an pe thin a. Player pakhatin kum hnih chhunga a khelhna club chuan pawisa hi an dawng thin a, club pakhat aia tama a khel a nih chuan club te chuan pawisa hi an insem a ngai thung a ni.

South Africa a 2010 World Cup khelh a nih dawn khan European club te chuan an player te’n ram tana an khelha an inhliam hian an tan phurrit a tam thu an sawi a, FIFA hnenah hian lungawi lohna an thlen a. Hetiang boruak a awm takah chuan FIFA chuan club te hnenah sum hi an pe ta thin a ni.

A bul tan kum, 2010 World Cup ah hian FIFA chuan $40 million an sem a, 2014 Brazil World Cup ah khan $70 million ah a pung chho a. Kumin World Cup ah chuan nasa takin an sum pek hi a pun belh a, $209 million zet mai an sem kual dawn a, hetianga an tihpun chhan pakhat chu club te’n Qatar-a 2022 World Cup khelh hun tur June/July ni loa November thlaa sawn an remtih vang a ni.

Pawisa hi ram 63 a club 416 zette chuan an dawng hlawm dawn a ni.