Manchester City chuan Etihad Stadium-ah Tottenham Hotspur an mikhual a, goal khatin an lo hneh a, Premier League title an kawl mek humhim thei dinhmunah an ding nghet zel a ni.
Nilai zan khan Tottenham chuan Europe khawmualpui lama Manchester City zinkawng an titawp a, Etihad Stadium-ah anni pahnih hi inkhelin, City chu 4-3 in chak mahse Spurs chu semi final lut zawkah an tang thei ta tho a. Premier League lamah erawh tlemin a thawnthu a danglam ta deuh a ni.
First half chhungin inkhel boruak a tang tha hle a, team pahnihte chu an innawr tawn nasa hle a, goal khat chauh a lut thung a. Inkhel an tan atanga minute 5 lekah Phil Foden chuan goal a thun a, Manchester City chu hma a hruaipui a. Premier League-a bul a tan vawi hnihna chauh niin, England rama league sang bera goal a thun hmasak ber a ni bawk.
Bernardo Silva chuan Tottenham goal lamah ball a vawrh phei a, heta ball kal hi Sergio Aguero chuan a lo tauh phei a, hei hi Phil Foden chuan Spurs goal-ah a lo thun a ni.
An lama goal a luh hnuah Tottenham chuan an nawr let nasa hle a, goal thun theihna hun tha pawh an insiam chho nual a. Christian Eriksen chuan Ederson chu a va chhaih nual a, Son Heung-min pawh a hlauhawm thei viau a, mahse an tum ber erawh an tipuitling thei tlat lo.
Minute 20-ah Jan Vertonghen chuan Silva a titlu a, Manchester City chuan penalty hlawh ngei turah an inngai a, mahse referee chuan penalty hi a hlawhtir lo thung a. City chuan inkhel an thunun chho reng a; mahse, chawlhlawk hmain Kevin De Bruyne chu a inhliam a, a khup a tina ni ngeiin a lang.
Half time thlengin goal dang a luh belh tawh lo a, mual neitu Manchester City chuan Phil Foden-a goal thun hmangin 1-0 in hma an la hruai a ni.
Second half an khel chho leh a, team pahnihte hi an innawr leh nghal viau a. Dele Alli chuan City box chhungah ball chu a pet phei a, heta ball kal hi Kyle Walker chuan a kutin a lo khawih ngei niin a hriat a, mahse referee chuan a ham lo a, Spurs hian penalty hlawh ngei turah an inngai a ni.
Minute 19 chauh a awm tawh tihin Leroy Sane chuan a sir atangin ball a vawrh phei a, hei hi Raheem Sterling chuan goal chhunga thun theihna hun tha a nei a, mahse Paulo Gazzaniga chuan a ke dinglamin a lo dang thei hlauh a ni.
Hun tawp thlengin goal a awm belh tawh lo a, Manchester City chu 1-0 in an chak a, Liverpool nen game khelh zat inangah City chu point 1 chiahin an sang zawk a, Premier League hmahruaitu an ni leh thei a ni.
Tun season chhungin Manchester City chu inelna hrang hrangah an khelmualah vawi 25 an chak tawh a, season khatah an khelmuala an chak hnem ber a la ni a. English league sang berah pawh 2010-11 season chhunga Old Trafford-a Manchester United vawi 26 an chak hnuah chak hnem thei ber an ni leh bawk.
May 2004 hnuah Tottenham chu Premier League away game-ah vawi 5 an tlawm zawn hmasak ber a ni a, 2004 khan manager David Pleat hnuaiah a zawnin away game-ah vawi 6 an tlawm a ni.
Manchester City tan hian kawng a la awlsam vak dawn chuang lo a, Nilai zan hian Old Trafford-ah ‘Manchester Derby’ an khel zui leh nghal dawn a. Hemi hma ni chiah hian Tottenham Hotspur chuan an khelmualah Brighton and Hove Albion an lo mikhual ve thung dawn a ni.