Manchester City chu UEFA Financial Fair Play dan bawhchhia nia an puhna atanga an ngaihdam hnuah an squad tichangtlung turin nipui transfer window inhawn hunah pawisa hman hnem an tum hle.
Court of Arbitration for Sport (CAS) chuan Manchester City chu Financial Fair Play dan bawhchhia nia an puh chungchangah thiamloh an chantir a, kum hnih chhung chu Europe khawmualpuia inelnaa tel thei lo tura tih an ni a. A hnuah City hian thuneitute thutlukna hi an khing let a, Premier League club chuan thiam an chang a, inkhel thei lo tura hremna an hlih bakah an pawisa chawi tur pawh €30 million atangin €10 million ah an tihhniamsak bawk a ni.
Ngaihdam an nih takah chuan Manchester City hian an squad tichak turin nasa taka hma lak an tum a. Nipui transfer window inhawn hunah pawh pawisa hman hnem an tum viau mai a, an player beisei tur pawh an chhawp hrang tan a ni.
An player neih sa zingah Kevin De Bruyne, Raheem Sterling leh Gabriel Jesus te chu Manchester City chuan contract thar ziahpui an tum dawn a. Hei bakah hian manager Pep Guardiola chu contract thar ziahpui an tum bawk a, hun rei tak chhung Etihad Stadium-ah Guardiola hi la kawl zui an duh a ni.
City hian tlar hnung lam thawm thatna an ngaihtuah a, defender thar pahnih chu neih theih ngei an duh a. Hei bakah hian Argentina ram lama kir leh duh nia an sawi Sergio Aguero thlaktu tur pawh an melh a tul bawk ang.
Guardiola nen lo inhrawn tawh, Bayern Munich player tangkai David Alaba, 28 bakah Napoli centre half Kalidou Koulibaly, 29, Valencia winger Ferran Torres, 20 leh Inter Milan striker Lautaro Martinez, 22 te chu Manchester City hian lak luh atan an hual hlawm a ni.
Club thuneitu lampang chuan nipui transfer window inhawn hunah Pep Guardiola chu pawisa hman tur £150 million vel zet pek an tum nia sawi a awm a. Heti a nih chuan Argentine striker Lautaro Martinez pawh lei tumin hma an lak theih a rinawm.
Barcelona chuan Lautaro Martinez lak an duh a, Camp Nou lam a pan mai ringtu pawh an awm a. Hetih lai hian Catalan club chuan £98.8 million release clause chu an chhan ngam a rinawm lo a, hei vang hian Premier League club tan kawng a inhawng ve thei dawn a ni.