Manchester City chuan tun nipui bazar-a an player thar pahnihna ni turin Dutch defender Nathan Ake chu Bournemouth atangin an lei fel.

City hian kum 25 mi Ake manah hian pound maktaduai 41 an senga, kum nga daih contract an ziahpui.

City hian Ake an lei fel hma deuh lawk hian Spaniard winger Ferran Torres chu Valencia atangin an leia, season thar atan inbuatsaih nasat an tum hle niin a lang.

Pep Guardiola hian City a zawm hnuah sum a seng hnem ta hle a, defender lakluh nan ringawt pawh pound maktaduai 300 chuang City hian an seng tawh a ni.

Chelsea academy chhuak Ake chuan City a zawm chungchang sawiin, “City hi kum sawm liamta chhunga England-a team tha ber an ni a, he hmuna ka rawn lut thei hi ka mangrama ka man thin a ni. City hi team tha ber zinga mi an ni a, world-class player hlir awmna a ni. Hawina lam apiangah player lar hlir hmuh tur an awma, mahni ram tana khel thei vek an ni,” tiin City website a hrilh.

Sawi zelin, “Pep hi khawvel pum huapa manager lar a ni a, a sulhnu hian engkim a sawi. A hlawhtlin tawhna zawng zawngte sawi sen a ni lova, a football khelh dan kalhmang hian min hip hle bawk. Team-a tel thei tur chuan ka thawhrim hle a ngai dawn tih ka hria a, mahse chumi ti tura he hmuna rawn lut hi ka ni a, trophy kan lak theih nan theihtawp ka chhuah dawn a ni,” a ti bawk.

Ake hian kum 2011 khan kum 16 mi a nih laiin Chelsea a zawma, Chelsea U21 captain thin niin, a captain lai hian U21 Premier League title pawh an la tawh nghe nghe a ni.