14 May 2019 10:40

inkhel

Manchester City in £200 million hman an tum

Pep Guardiola chuan Premier League title a la zo deuh chiah a, heti chung hian nipui transfer window inhawn huna player lei tur tinzawn a nei tan tawh a. Manchester City player lei thar nan £200 million vel zet hmang tura rin a ni.

Manchester City manager Pep Guardiola chuan season thar atan squad siksawi nual a rilruk a. Hetiang tur hian a lo berah defender thar pakhat, midfielder thar pahnih leh striker pakhat chu lei a tum a ni.

City chuan Atletico Madrid central midfielder Rodri chu an hmutai viau mai a, tun thlaa kum 34 tling tawh tur Fernandinho elpui tur an melh a, chutiang tur chuan kum 22-a upa Rodri hi City sporting director Txiki Begiristain chuan a thlithlai uluk hle a. Spanish central midfielder hian a contract-ah release clause £60 million a dah a, hei hi City chuan pek an inhuam hle.

Eintracht Frankfurt striker Luka Jovic chu Manchester City hian an thlithlai nasa viau bawk a, hun eng emaw kalta atang khan beiseina mitin an thlir ngar ngar tawh a. Jovic bakah hian Benfica star kum 19-a upa Joao Felix pawh an melh uluk viau bawk a ni.

Luka Jovic hi £50 million man bawr vel ni tura ngaih a ni a, Europe khawmualpuia club lian tam tak chuan lak luh theih dan an ngaihtuah mek hlawm a. Jovic lak duhtu zingah hian Real Madrid pawh an tel a, mahse Frankfurt chuan European competition an khel pha dawn a nih chuan hralh chhuah loh dan an ngaihtuah a rinawm.

Tlar hnung lam thawm thatna atan Manchester City chuan Leicester left back Ben Chilwell chu an ngaihven viau bawk a. Ajax atanga Matthijs de Ligt lak theih chu duh viau mahse, Guardiola chuan Barcelona te ang club ropui inrawlhnaah chuan anni tan chet ngaihna a awm loh thu a sawi.

Pep Guardiola hian Leicester player Harry Maguire chu a ngaisang viau bawk a, Ilkay Gundogan chu chhuak mai thei dinhmunah a din avangin midfielder tha tak chu a mamawh dawn a ni.

Player lei thar tur an ngaihtuah lai hian an player neih sa chhuak tur an awm nual hmel hle a, Nicolas Otamendi, Fabian Delph leh Eliaquim Mangala te chu season tawp huna chhuak tur chiang sa an ni tawh a ni.