Manchester City hnehin Wolves an champion

21st July 2019, 01:07AM

Manchester City chuan 2019-20 season bul tanna atan trophy lak theihna hun tha an neih chu an bawhpelh a, Wolverhampton chuan City hi an hneh a, Premier League Asia Trophy an la.

Wolves leh Manchester City te hi Shanghai khawpuiah an inkhel a, Premier League Asia Trophy final-ah hian hun pangngaiah team pahnihte chuan goal an thun thei lo ve ve a. Hun tawp thlenga an la inhnehtawk zel avangin penalty shoot-out hmangin Wolverhampton Wanderers hi an chak ta a ni.

Season hman zawh takah khan Pep Guardiola leh a pawlte chuan England ram chhunga trophy an lak theih chu an la fai vek a. Tuna season tan tak tak hmaa an inpuahchahnaah trophy lak belh theihna hun tha an nei a, an hun tha neih erawh an hmang tangkai ta lo a. Thla thara Community Shield chu trophy lak belh theihna hun tha awm leh hmasa ber tur a ni ang.

City hian first half chhungin goal thun theihna hun tha an nei a. Adama Traore chuan Wolves bo chhunga Leroy Sane chu a titlu a, referee Martin Atkinson chuan Manchester City chu penalty a hlawhtir a.

Raheem Sterling chu a pen chhuak a, penalty hi a pet a. A hmaa West Ham United nen an inkhelh tuma central attacking chanvo nei Sterling chuan Hammers lakah goal hnih thunin City chu final hi a luhpui a, final-ah hian yard 12 atangin goal zawnah a pet fuh ta lo a ni.

Hemi hnuah hian team pahnihte chuan hun tha tak an nei ngah lo viau mai a. Minute 77-ah David Silva chuan free kick a pet a, Patricio chu a chhaih buai ve deuh a, hei bak hi chu hun pangngaiah chuan sawi tur a tam lo hle.

Hun a tawp a, penalty shoot-out hmanga chak zawk zawn a ngai a. Wolves captain Conor Coady chuan a pet hmasa ber a, a thun lo nghal ringawt a. Ilkay Gundogan chuan a pet zui ve nghal a, Patricio chuan a lo dang ve leh bawk a, 0-0 a la ni.

Ryan Bennett chu a pen chhuak a, Wolves tan a pet goal a, 1-0 a ni ta a. David Silva chuan City tan a pet ve thung a, Patricio chuan Silva ball pet chu a lo dang leh a, Maximilian Kilman chuan goal pawn lamah ball chu a pet zui ve leh bawk a ni.

City tan Danilo chuan a pet a, Patricio hnuaiah chuan ball a kal a, 1-1 a ni thei a. Hemi hnuah hian Taylor Perry chuan Wolves tan a thun zui ve leh a, 2-1 a ni nghal a. Aleix Garcia chuan City tan a thun ve leh nghal zat a, 2-2 a ni.

Ruben Vinagre chuan Wolves tan thun vein 3-2 a ni leh a, hemi zawh chiahah hian Manchester City tan Nmecha chuan a pet ve leh a, Patricio chuan a lo dang leh hlauh mai a, Wolverhampton chu Premier League Asia Trophy 2019 champion an ni theih ta a ni.

Final khelh hma hian Newcastle United chuan West Ham United chu 1-0 in an hneh a, Japanese striker Yoshinori Muto goal thun zarah Magpies chu Premier League Asia Trophy 2019 ah hian pathumna an ni.

Copyright © inkhel.com 2024. All rights reserved.