Manchester City hian title zawng zawng an la thei: Aguero

18th February 2019, 10:02PM

Sergio Aguero chuan tun season chhungin Manchester City chu title lak theih zawng zawng la thei tur khawpa tha an nih thu a sawi.

Pep Guardiola pawlte chuan 6-0 ngawtin Chelsea an sawp a, Premier League hmahruaitu an nih leh theih phah a. Inrinni khan FA Cup fifth round-ah Newport County chu 4-1 in an hneh bawk a ni.

UEFA Champions League khel turin Germany lam an pan dawn a, Schalke nen an inkhel ang a, hemi hnu hian Wembley-ah EFL Cup final an khel ang a, hetah hian Chelsea nen an inhmachhawn dawn a. Hetiang hmabak an neih chhoh nualah hian Sergio Aguero chuan title awm thei ang zawng zawng chu lak a duh thu a sawi a ni.

Aguero chuan, “Tun anga season chawhnu lamah pawh inelna hrang hranga la tel kim theih vek chu thil tha tak mai a ni a, title pali la thei dinhmuna kan la ding hi kan che tha thawkhat tihna a ni,” a ti.

“Title pali hi lak theih ngei pawh ka duh a, a sang thei ang ber thlen zel duh mi ka ni a, tumna sang tak neih hmasak phawt hi a pawimawh ber mai. Season khata title pali la thei hi an la awm lo a, hei vang tak hian chutiang ti thei hmasa ber nih theih ngei hi ka duh a, mi reng rengin kum tam tak liam hnuah pawh min sawi chhuah fo theihna tur tha tak a ni,” a ti bawk.

A sawi zelnaah, “Final luh theihna apianga luh vek a, final kan khelhah hian goal thun theih vek ka duh a. Tuna Manchester City team ka en hian title lak theih zawng zawng la thei tur khawpa tha an ni tih ka chiang hle a, chutiang tihpuitlin tum chu kan tan chona lian tak a ni,” a ti.

Chelsea nen an inkhelh tumin Argentine forward hian hattrick a siam a, Premier League-ah hattrick vawi 11 siamin Alan Shearer-a record a nihrual thei chiah a. Tun season chhungin Aguero hian game 23 khelhah goal 17 a thun tling tawh a ni.

Kum 30-a upa Aguero hi a awm zel dan tur an inrinsiak chho mek a, Manchester City tana goal thun hnem ber hian a hun tawp thleng City ah awm a tum dawn nge a chawr chhuahna club, an ram lamah a kal dawn tih chu mi ngaihven pakhat a ni a. Aguero chuan Etihad Stadium chhuahsan mai chu a la tum loh thu a sawi a ni.

“Manchester City hi champion team an ni a, champion coach in a kaihruai bawk a, ka tan eng dang nge thlakhlelh tur awm chuang?” tiin chhuah a tum loh thu hi a sawi.

“City ah hian ka hlim hle a, tun dinhmunah chuan chhuah lampang hi ka rilruah a la awm lo hrim hrim a. Club ropui tak niin, player te hmakhua an ngaihtuah tha hle a, helai hmun ka pan hmasak ber atang khan chu chu ka hmu tlang nghal vek tawh a ni,” a ti.

Aguero chuan a sawi zelnaah, “Inkhel ka chawlhsan hunah engtin nge ka awm zel dawn tih hi ka la ngaihtuah lo a, mahse football khawvelah hi chuan ka la inhman zui zel ka ring. Tunah hi chuan City hi title tam thei ang ber lakpui ka tum ber a, season tin title lakpui ka tum,” a ti.

Copyright © inkhel.com 2024. All rights reserved.