Manchester City an sang tial tial

02nd December 2018, 04:12AM

Etihad Stadium-ah Premier League champion lai Manchester City chuan Bournemouth an lo mikhual a, he inkhelah hian City chu 3-1 in an chak a, Premier League ah point 5 in hma an hruai fal mek a ni.

Pep Guardiola chuan UEFA Champions League a Lyon nen 2-2 a an inhnehtawk tuma City tana goal khungtu Sergio Aguero chu a chawlhtir a, Gabriel Jesus chu tlar hmaah a dah a. Bernardo Silva pawh a inlan ve leh tawh a, David Silva leh Kyle Walker te chuan substitute bench an luah lum a ni.

Bournemouth chuan an game hnuhnungah Arsenal chu 1-2 in an hneh lo a, hemi tuma an khelh dan chu an thlak danglam ve nual bawk a. Tyrone Mings chuan tun season chhunga a vawi khatna atan Premier League-ah bul a tan ve a, hrem tawk mek Jefferson Lerma chu a tel thei lo a, David Brooks pawh substitute bench lamah a thu bawk a ni.

Manchester City XI: Ederson; Danilo, Nicolas Otamendi, Aymeric Laporte, Oleksandr Zinchenko; Bernardo Silva, Fernandinho, Ilkay Gundogan; Raheem Sterling, Gabriel Jesus, Leroy Sane

Subs: Arijanet Muric, Kyle Walker, Vincent Kompany, Phil Foden, David Silva, Fabian Delph, Riyad Mahrez

Bournemouth XI: Asmir Begovic; Simon Francis, Steve Cook, Nathan Ake, Tyrone Mings, Charlie Daniels; Joshua King, Andrew Surman, Lewis Cook, Ryan Fraser; Callum Wilson

Subs: Artur Boruc, Diego Rico, Dan Gosling, David Brooks, Junior Stanislas, Lys Mousset, Jermain Defoe

Manchester City tan hian Bernardo Silva, Raheem Sterling leh Ilkay Gundogan te chuan goal khat theuh an thun a, Bournemouth goal neih chhun hi Callum Wilson thun a ni.

Inkhel tan atangin Manchester City chuan inkhel thunun an tum nghal hle a, an tum pawh hi an tihlawhtling viau reng a. Tun hnaia Premier League-a anni pahnih inhmachhawn vawi 6 ah Manchester City chu a chak zawkah an la tang vek a, goal 21 an thun tawh a, vawi hnih chiah goal an la chhuah ve a, hei vang hian an tan chuan inrintawkna neih loh theih a ni lo.

Minute 16 an khel a, goal hmasa ber a lut a. Oleksandr Zinchenko chuan Leroy Sane tan ball a pet phei a, hei hi Bournemouth goalkeeper Asmir Begovic chuan a lo khawih a, ball kal zel chu Portugal midfielder Bernardo Silva chuan an mikhual goal ah chuan a thun a, City chu hma a hruaipui a ni.

City hian manager Pep Guardiola hnuaia Premier League game an khelhah an khelmualah goal 126 an thun tling chiah a, Bournemouth hian 2016-17 atang khan Premier League ah goal 122 an chhuah tawh thung.

An khelh chhunzawm leh nghal a, hemi hnu hi chuan goal a lut thei lawk tawh lo a. Half time hma hretin mikhual team hian goal an thun ve hlauh mai a, Callum Wilson chuan an si phurh a sut a.

Minute 44-ah Simon Francis ball vawrh chu Callum Wilson chuan City goal ah chuan a lo tauh lut a, half time a thlen chuan 1-1 in an inhnehtawk theih phah a. Wilson chu Premier League game 15 a khelhah goal 12 ah a inrawlh tling chiah a, Gareth Southgate chuan England squad-a ko tel lo chi a lo nih lohzia a lantir a ni.

Second half tan atangin an innawr chho leh nghal a, Manchester City chuan hmahruaitu nih leh an tum hle a, theihtawp an chhuah chho a. An thawhrimna chuan minute 57-ah rah tha a chhuah ta nge nge a ni.

Raheem Sterling chuan Danilo chu ball a pe a, Danilo chuan goal-ah a pet a, Begovic chuan ball hi a lo man lo a, heta ball kal zel hi Sterling chuan hnai zet atangin a lo thun a, a vawi hnihna atan City chu hma a hruaipui leh a. Raheem Sterling hi Premier League bikah chuan an khingpui pangngai te lakah an inhmachhawn hmasak vawi 6 a goal thun vek thei awm chhun a la ni.

Bournemouth tha a tho ta lo hle a, minute 79-naah Manchester City chuan goal dang an thun belh zui a. Leroy Sane leh David Silva te thawhrah sengin Ilkay Gundogan chuan Manchester City goal thumna a thun a, hun tawp thlengin goal dang a luh belh ta lo a, Manchester City chu 3-1 in an chak thei ta a ni.

Copyright © inkhel.com 2024. All rights reserved.