12 May 2019 11:16

bakteaJr.

Mizo tlangval

​Manchester City an champion leh ta!

Premier League hmawr bawk fel a ni ta a, season khar niah Manchester City chuan Brighton tlawhin hnehna an changa, an Premier League title kawl lai an humhim.

Manchester City hi 4-1 in an chaka, point 98 hmuin an champion a, an hnuai chiaha awm Liverpool aiin point khatin an sang zawk. City hi tun season-ah vawi 32 lai hnehna an changa, vawi hnih an tumpuite inhnehtawkpui in vawi li an tlawma, tunah hian a zawnin game 14 chhung an chak mek.

City hi a zawnin an champion ta a, a zawna Premier League-a champion thei manager hi Pep Guardiola tih lovah chuan Jose Mourinho leh Sir Alex Ferguson-te bak an la awm lo. Season hmasa khan City hi point 100 hmu in Premier League chanchina point hlawhchhuak hnem ber an ni a, tun season-ah 98 an hmu leh thei hi champion nawn thei zingah pawh City hi an ropui ber a tih theih hial awm e.

City hian season tawp ni hian 4-1 in Brighton an hneh a, Brighton lam hian Glenn Murray-a goal hmangin hma hruai hmasa zet mahse City beih letna an dawl zo lova, City tan Sergio Aguero, Aymeric Laporte, Riyad Mahrez leh Ilkay Gundogan-te chuan goal khat theuh khungin 4-1 in an chak.

Pep Guardiola hi football manager zawng zawng zinga ropui ber pakhat a ni ngei tawh dawn tih chu phat rual a ni lova, La Liga, Bundesliga leh Premier League-ah te a zawna league title la vek thei manager awmchhun a ni.

Brighton 1-4 Manchester City

(Murray 27’) (Aguero 28’, Laporte, 38’, Mahrez 63’, Gundogan 72’)

Player Ratings

Brighton: Ryan 6, Bruno 6, Duffy 5, Dunk 5, Bernardo 5, Knockaert 6, Kayal 6, Bissouma 5, Jahanbakhsh 5, Gross 5, Murray 6. Subs: Montoya n/a, Locadia 5, Andone 5.

Man City: Ederson 5, Walker 6, Kompany 6, Laporte 7, Zinchenko 7, Gundogan 9, David Silva 8, Bernardo Silva 8, Mahrez 8, Aguero 8, Sterling 7. Subs: Danilo n/a, Otamendi n/a, De Bruyne n/a.

Match Report

Brighton hian 4-5-1 formation an hmanga, Ryan chuan si ban nghakin defence-ah Bruno, Duffy, Dunk leh Bernardo-te an intlar. Midfield-ah Beram Kayal, Bissouma leh Pascal Gross-te aawmin a sirah Knockaert leh Jahanbakhsh-te dah an ni a, hmatawngah Murray chu maltlat tir a ni.

City lamin 4-3-3 formation an hmanga, Ederson chu si ban ngah tir a ni a, defence-ah Kyle Walker, Vincent Kompany, Laporte leh Zinchenko-te dah an ni. Midfield-ah David Silva, Bernardo Silva leh Gundogan-te awmin, hmatawnagah Aguero, Mahrez leh Raheem Sterling-te dah an ni bawk.

Rin lawk ang ngeiin City in inkhel an thunun a, ball pawh an chang tam daih zawk. City hian ball chang tam mahse Brighton hi tlar hnungah an inhnawh deuh avangin City lamin an thiat thei mai bik lo. Game-play ah an inkhan lem loh avangin inkhel hmuhnawm tak a ni hran lo. Darkar chanve khelh a nih hma deuh chiahin beisei loh lam Brighton-in goal an khunga, Murray chuan corner atanga ball vawrh luh chu City goal-ah a lo tauh lut.

Brighton in goal khung mahse an lawm re lova, an goal khung atanga minute khat hnuah Aguero chuan City si phurh a sut zui ve nghal; Brighton box chhungah Argentine striker hi ball pek a ni a, goal veilam sir atangin lei hrulah ball a peta, Brighton keeper Ryan-a kapkarah petin goal-ah a chan tir. Darkar chanve khelh a nih chiahin Zinchenko chuan veilam atang Brighton box chhungah ball a vawrh lut, Bernardo chuan lo tauh mahse harsa lutuk lovin Ryan chuan a lo save.

Half time hnaih tawh lamah City in hma an hruai ta nge nge a, corner atanga ball vawrh luh chu French defender Laporte chuan chiang takin Brighton gola-ah a tauh luta, City in hma an hruai. Half time hma lawkin Dunk chuan box pawn veilam hret atangin City goal-ah na takin ball a chhuiha, pet chhe lem lo mahse Ederson chuan a lo nam chhuaka, 2-1 in first half tihtawp a ni a, City lamin champion lam an hnaih zel.

Second half tan a ni a, City hian hma an hruai hnu hian an khel an ti muang hret niin a langa, goal lam an bawh lem lo. City in ball chang tam chhunzawm zelin inkhel pawh an thunun zual sauh sauh a, Brighton lamin an khelhpui thei meuh lo.

Darkar khat khelh a ni chho va, City player manto ber Mahrez chuan City goal thumna a khung; Mahrez hian box pawnah ball a chawka, fing taka Brighton defender a bum hnuah a ke hmanthiam loh lam, a ke dinglamin Brighton goal top corner-ah ball a chhuih luta, City hian champion an hnaih zual hle.

Minute sawm sarih chuang hret khelh a nihin German midfielder Gundogan chuan goal dang City tan a khung belh a; City hian yard 25 vela hlaah freekick hmu in Gundogan hian freekick atang hian mawi em em in a chhuih luta, City tan champion chu chiang tluk a ni ta.

Goal luh belh awm tawh lovin City hi an champion ta a, Sir Alex-a’n kum 2008 leh 2009-a United a zawna a champion pui hnuah City chu Premier League-a champion zawn leh thei hmasa ber an ni ta a ni.