04 Mar 2020 10:39

bakteaJr.

Mizo tlangval

​Manchester-ah Dillian Whyte leh Povetkin an inhnek dawn

British heavyweight boxer Dillian White chuan kumin May thla ni 2 hian Manchester-ah Russian heavyweight boxer Alexander Povetkin chu a hmachhawn dawna, interim WBC world heavyweight title tan a ni dawn.

Whyte hi WBC heavyweight title kawl tu Tyson Fury-a mandatory challenger ni mahse Fury leh Deontay Wilder te hi a vawi thum nan an inhnek leh dawn avangin Whyte hian a la nghah zel rih a ngai dawna, hemi chhung hian Povetkin a lo hmachhawn dawn.

Kum 31 mi Whyte hi vawi 28 inhnek tawhin vawi khat bak a la tlawm lova, Anthony Joshua a hneh lo tih loh chu a la hneh veka, Manchester Arena-ah Povetkin lakah hnehna chan a tum leh dawn.

Kum 40 mi Povetkin hi world champion hlui niin vawi hnih a tlawm tawh thunga, Povetkin pawh hian Anthony Joshua lo hneh lo tawhin AJ bakah hian Wladimir Klitschko a lo hneh lo tawh bawk.

Whyte chuan Povetkin nen an inhnek tur chungchang sawiin, “A mah hi ka palzam dawn lova, boxer tha tak leh hmachhawn harsa tak a ni,” a ti.

Whyte-a promoter Eddie Hearn chuan, “Dillian Whyte hi Tyson Fury-a mandatory challenger niin, nghah chhung hi a rei duh em em a, mahse heti chung hian a tan risk sang tak tak fight a la hmachhawn duh tho a, hei hi mipuiin an ngainat bik em em chhan pawh a ni,” a ti ve bawk.

Povetkin chuan Whyte nen an inhnek tur chungchang sawi ve in, “Whyte ka hmachhawn tur hi ka lawm a, kan buaipuina a rei tawha, mahse chhan hrang hrang avangin a thleng thei ngai lo. Dillian hi boxer chak tak a ni a, rik hluai aia ring chhungah hnehna chang duh mi ka ni a, May ni 2 hian mipuiin fight hmuhnawm tak an hmu dawn a ni,” a ti.