Sunday zan Premier League inkhelah Manchester derby kan hmu a, Manchester United chuan an thenawm Manchester City chu Old Trafford-ah lo mikhualin, United hian si hnih faiin hnehna an chang.
United tan hian Anthony Martial leh Scott McTominay-te chuan goal an khunga, inkhel pawimawh takah Red Devils hian point 3 hlu tak an hlawhchhuak.
Khelh 29-ah United hian point 45 hlawhchhuak tawhin 5-naah an chho a, an chung chiaha awm Chelsea aiin point 3-in an hniama, an hnuai chiaha awm Wolves aiin point hnihin an sang.
City hian khelh 28-ah point 57 hlawhchhuak tawhin hmahruaitu Liverpool chu point 25 laiin an pha lova, City hi khelh khatin an khel tlem zawk. City hi an hnuai chiaha awm Leicester aiin point 7 an sang zawk bawk.
Sir Alex Ferguson-a awm loh hnuah a vawi khat nan United hian Premier League season khat chhungin an hmelma City hi home leh away-ah an hneh a, Sir Alex-a ho khan United hian kum 2009-2010 season khan City hi home leh away-ah an hneh tawh. United hian City hi tun season-ah League Cup-ah an hneh tawh bawka, an hmelma lakah hian tun season chhungin vawi thum hnehna an chang tawh.
Inkhel a hmuhnawm thawkhata, team hnihte an intum tawka, United hi khel tha hle in, City erawh an khelh that ber zan a nilo chiang hle. United tan Wan-Bissaka a tangkaia, lehlam tan a hnawk hle a, Fred pawhin tun hnaiah hma a sawn zia a lan tir leh a tih theih awm e.
Darkar chanve khelh a nihin United hian ho angreng takin City box pawn vei lampangah freekick an hlawhchhuaka, freekick atang hian Bruno Fernandes chuan ball pirin, a hmaa City player awmte a pir khum; Martial chuan box chhungah ball a sawh hma hian a lo pet nghala, near post lamah Martial hian petin Ederson chuan ball lo khawih mahse a dang zo lova, United in hma an hruai.
Goal an khung hnuah United hian uluk lehzualin an tlarhnung an veng a, an defender te an khel tha tlang hle. City hian chance nei ve thin mahse an hlauhawm lutuk thei lova, Sergio Aguero-a goal khung chu offside avanga pawm a nih loh bakah United goalkeeper David de Gea pawhin save tha tak tak pahnih khat a nei bawk.
City hian ball an chang hnem zawk tluana, mahse an ball chan hnem hi hmang tangkai thei lovin, chance an siam chhuak hleithei meuh lo. City hi an khel chhe tlanga, in pass sual an ngahin United an khel tha bawk nen an che hleithei lo a ni ber.
City hian an si phurh rulh tumin hun tawp thleng bei mahse hun tawp hma lawkin an beiseina a tawpa, United hian City keeper Ederson-a tihsual atangin goal an khung leh; Ederson chuan a box chhung vel chiah chiah ball kengin, an defender te lamah vawm a tuma, Braziian keeper hian duh aiin a vawm thuia, McTominay chuan lo changin ani hian kawh takin goal-ah yard 35 vela hla atangin a pet lut; Ederson hian a goal a rauhsan tawh nen tihtheih a nei lova, United hian injury time-ah an goal hnihna khungin hnehna an chang zui ta a ni.
Manchester United 2-0 Manchester City
(Martial 30’, McTominay 90+6’)
Player Ratings
Manchester United: De Gea 6, Lindelof 7, Maguire 7, Shaw 7, Wan-Bissaka 7, Matic 6, Fred 7, Fernandes 8, Williams 7, James 6, Martial 8. Subs: Bailly 6, McTominay 7, Ighalo NA.
Manchester City: Ederson 5, Cancelo 6, Otamendi 7, Fernandinho 7, Zinchenko 6, Rodrigo 6, Gundogan 6, Foden 6, Bernardo 6, Sterling 6, Aguero 6. Subs: Jesus 7, Mendy 6, Mahrez 7.