Manchester United midfielder manto Paul Pogba chu kumin World Cup-ah a ram France tan khel tha hle mahse United tan erawh midfielder vantlang ang maiin a khel a, pundit tam tak phei chuan midfielder vantlang pangai pawh Pogba hian a phak rih lo hial niin an sawi.

Juventus-a a awm lai pawhin Pogba hi midfielder tha tak a ni a, tunlai midfielder tha sawi dawn chuan Pogba hming lam rik fo ni mahse a bikin tun season-ah United tan eng a ang thei lo. France tan khel tha hle mahse United tana a khel tha lo chuan mak tih a hlawha, a chhan leh vang hre chak pawh a tam hle. United legend Paul Scholes phei chuan season tir lam khan, “Tunah hian kum 40 ka chuang tawh a, mahse Pogba ai hian United tan khelmual chhungah ka la tangkai zawk ka ring,” a lo ti hial.

Mi tam takin Pogba khelh that loh chhan chu United manager Jose Mourinho vang niin an sawi a, Pogba leh Mourinho-te hi season liamta atang khan inhmuh thiam lohna an lo nei zeuh zeuh tawh niin a lang bawk. Heti ang a nih avang hian Pogba chu Mourinho hnuaiah a khel chak lo leh phur lo ni a ngai an tam hle a, Mourinho erawhin chuti ang ngaihdan chu a nei ve lo thung.

Mourinho chuan, “He thawnthu in sawi thin hi ka hrethiam ve lo. In sawi ang hi a nih tak tak a; player-in manager a ngainat vang chauha a khel tha a nih chuan, chu player chu mi rinawm lo a ni tihna a ni. Footballer chuan hlawh tha tak a nei a, professional footballer ni turin tha taka hlawh pek a ni.

“Hlawh sang tak pek an nih chhan chu eng nge ni ta ang? An duh chin training turte, an duhdan leh an duh chin khel turte in em ni? Manager vangin player a khel tha in a khel chhia intih chuan chu player chu mi rinawm lo tak a ni in tihna a ni,” a ti.