02 Dec 2019 10:36

bakteaJr.

Mizo tlangval

​Manager chuan release-clause kan nei deuh vek: Rodgers

Tun hnaiah Leicester City an che tha hle a, season liamta laklawha Brendan Rodgers an lakluh hnuah nasa takin Leicester hian hma sawnin, tun lai Premier League club zinga che tha ber pawl an ni.

Leicester chet that chhan bul ber chu an manager Rodgers a tih loh theih lova, Rodgers an rawih atanga chhutin Leicester aia che tha hi Premier League-ah Liverpool leh Manchester City bak an awm lo.

Leicester hian tun season-ah Premier League game 14 khel tawhin vawi 10 hnehna an chang tawha, vawi hnih an tumpuite inhnehtawkpui tawhin vawi hnih an tlawm tawh bawka, tunah hian point 32 hlawhchhuak tawhin pahnihnaah an awm meka, pathumnaa awm Manchester City aiin point 3-in an sang zawka, hmahruaitu Liverpool chu point 8-in an pha lo bawk.

Rodgers hi Arsenal chuan an manager a tana an mi duh ber niin English chanchinbu mite chuan an ziak nasa hle a, Arsenal hian kar hmasa khan an manager Unai Emery banin manager thar an la nei leh lova, an assistant manager Freddie Ljungberg chuan Arsenal hi a enkawl lailawk rih.

Chanchinbu mite tarlan danin Rodgers hian Leicester-ah hian release-clause pound maktaduai 14 vel a nei a, hemi hi club dangin an pe tla a nih chuan Rodgers hi an khul chhuak thei dawn.

Leicester hian an game hnuhnung berah Everton chu 2-1 in an hneha, inkhel zawhah Rodgers chu Arsenal nena sawizawm a nih chungchang zawh niin, release-clause chu sawi anga a neih leh neih loh zawh a ni bawk.

Rodgers chuan release-clause a neih leh neih loh chungchang zawhna chhangin, “Manager-te contract-ah hi chuan release-clause hi chu a awm deuh vek ang, mahse heti ang hi chu rinthu baka sawi theih a ni lo. Everton laka kan chak hi ka lawm em em a, ka rilru hi chu Leicester-ah a awma, thla hnih emaw thla kua emaw liamta mai khan ka zawma, he hmunah hian a tir atang khan ka la hlim reng a ni.

“Ka player-te nen hian tih tur kan la ngah hle in ka hria a, manager dangte contract chungchang chu ka sawi sak thei lo na in kei erawh chuan Leicester bak hi ka ngaihtuah lo. Ka career chhungin club tha tak tak enkawlna hun ka nei thei hi ka vannei hle in ka hria a, Leicester ka zawm khan he club hi top 6-a awmpui chu ka thil tum ber a ni a, tunah rih chuan tum angin thil a la kaltluang zel rih.

“He club puih zel hi ka thil tum ber a ni a, hmalam zawnga he club kaihhruai zel hi ka duh a, Leicester hian kum lo la awm zel tura chak taka kal turin theihna an nei sang em em a ni,” a ti.