Manchester United chuan an player hlui Paul Pogba chu tun nipui bazarah hian lei tumin hma an la chho tan, Juventus chuan an midfielder pawimawh hi chhuah phal dawn lo mahse kum 22 mi Pogba-a agent hian Juventus nena an inkar a sawi chiang chho zel.

French International hian inhliam vangin tun season tawp lam Juventus tan a khel hleithei lo. Europe club lian tak tak ten he midfielder naupang tak hi an duh deuh vek kan ti thei awm e. Pogba-a agent Raiola chuan,"Juventus nena kan inkar hi chat thut thei dinhmunah a ding reng. Paul-a chungchang hi sawi vak ka duh lo, ka sawi theih chhun chu club lian zawng zawngin an duh vek a ni," tiin Premier Sports a hrilh.

Manchester United hian an player hlui hi theih tawpa lak let tumin hma an la dawn niin sapram media te chuan an tarlang a. Hetia Riola-a'n thu a neih leh takah phei hi chuan Pogba hian Juve a chhuahsan mai dawn nia ngaite pawh an awm chho ta nawk mai. Louis van Gaal hian Juventus midfielder hi £70m pawhin a ngam nia tarlan a ni a. Hetih lai hian £54m leh Robin Van Persie pe tela Pogba lei pawh a hreh lo niin Metro chuan a tarlang.