​Man Utd hnawla Spurs-a cham thlang Kane

19th June 2015, 02:06PM

Tunlai transfer bazar-a player HOT ber pakhat chu Tottenham striker Harry Kane hi a ni. Season liamta a chet that em avangin English club lian pakhat Manchester United chuan £40m laia lakchhuah an tum niin media-ah thu a thang.

England Under 21 striker kum 21 mi hian Tottenham chu club lian a nih thu leh cham chhunzawm zel a tum thu a sawi chiang.

"Spurs-ah hian ka hlim tawk a ni. Spurs-ah hian ka hma hun tur ka thlir zawk a ni. Club dang min duhtu an awm nual a ni maithei, club dang ten min duh theih nan min fak chawp ni maiin ka hria," tiin Kane chuan a sawi.

Season liamta khan Kane hian Spurs tan competition hrang hrangah goal 31 lai a khung a, PFA Young player of the Year-a thlan a ni. Kane hi Manchester United official pakhatin lei an tum tur thu a sawi chhuah atangin media chaw tui ber a ni a. Man Utd player hlui ten Old Trafford a pan theih nan nasa takin an fak bawk a.

Manchester United-in an duh tih hre mahse Kane hian Tottenham chu England-a club lian a nih thu sawiin,"Tottenham hi England-a club lian pakhat a ni, chu chu mite ngaih dan pawh a ni. Club lianah ka khel mek a ni," tiin a sawi.

Nizan khan European Under-21 Championship Opening match-ah England Under 21 chuan chuan si khat faiin Portugal Under 21 an hneh lo a ni.

Copyright © inkhel.com 2024. All rights reserved.