Manchester United chuan loan-in Austrian midfielder Marcel Sabitzer chu Bayern Munich atangin an la lut.

Kum 28 a upa Sabitzer hian Christian Eriksen leh Scott McTominay te inhliam chhungin Erik ten Hag-a squad ah hian tun season tawp thleng a cham ang.

Sabitzer hian kum 2021 August thla atang khan Bayern a zawm hnuin Bayern tan hian vawi 54 a inlan tawh a ni.

"A chang chuan nunah hian a rang thei ang berin thutlukna pawimawh tak siam a ngai thin," tiin Sabitzer hian a sawi a.

"He hun remchang hi ka hmaa chhawpchhuah a nih chiah khan ka tana tha tur a ni tih ka hre nghal. Midang nena inel nuam ti tak player ka ni a, chak ka duh a, he club-in tun season-a tihhlawhtlin a tum thil tam takah hian puih ngei ka duh a ni," tiin a sawi chhunzawm.

Sabitzer hi RB Leipzig captain a ni thin a, hetih hunlai hian Leipzig tan hian vawi 443 teh meuh mai a inlan hman a.

An ram Austria tan pawh hian vawi 68 inlan tawhin, goal 12 a thun tawh bawk.

Eriksen hian a ke rekah hliam a neih avangin a tel lo hian United hi April thla tawp vel thleng an inkhelh a ngai dawn a, McTominay pawh inhliam avang bawkin hun rei lo te a chawlh a ngai dawn. Hemi avang hian Ten Hag hian central midfielder chhawr tur pahnih, Casemiro leh Fred te chauh a nei a. An hmabaka an hmachhawn leh turte chu Nottingham Forest leh Crystal Palace te an ni.

United hian inelna pali lai khelh tur an la nei a, Nilaini hian first-leg a 3-0 a an lo hneh tawh Nottingham Forest nen Carabao Cup semi-final second-leg an khel dawn ang.

Sabitzer bakah hian United hian Netherlands striker Wout Weghorst chu Burnley atangin loan bawk hian tun thla chhung khan an lo la lut tawh bawk a. An defender neih sa Axel Tuanzebe pawh Stoke City lamah tun season chhung cham turin loan in a kal ve bawk.

Kum 25 a upa Tuanzebe hian season hmasa khan chawhma lamah Aston Villa tan loan in a khel a, season chawhnu lamah pawh Serie A club Napoli tan loan bawkin alo khel tawh a ni.