Javier ‘Chicharito’ Hernandez chu loana a khelh mekna Real Madrid chuan kawl hlen an tum lo tiin Marca chuan a chhuah. Hei vang hian Chicharito hi Man Utd ah a kir leh dawn niin a lang.

Nikum August thla khan Hernandez hi Man Utd chuan loanin Real Madrid ah an thawn chhuaka, Cristiano Ronaldo, Karim Benzema leh Gareth Bale te em han el phak chu a har deuh a nia nge, a inkhelh ve chhunah pawh a tam zawk chu bench atangin a tan deuh ziah a ni.

Tun season ah khan Ancelotti hnuaiah vawi 33 a inlan ve hmana, game 12 ah chiah start-na hun a chang thung. Season tawp lamah a rawn che langsar viaua, Champions League quarter final 2nd leg a Atletico lakah chakna goal a khung nghe nghe a nih kha.

Season tawp hnaih tak takah Benzema a rawn dam chho leha, che tha viau mahse hmun a chang lo chhunzawm nghal zat bawk. He chachin hian Van Gaal engtin nge a den dawn tih hriat a chakawm tawh hle a, Chicharito hian tun dinhmunah Van Gaal pawh a la hmin tak tak bik hrih lo nia sawi a ni.