Manchester United player te chuan COVID-19 dona atan an hlawh atanga 30% theuh an thawh a, an hlawh thawh khawm hi a vaiin £3.5 million zet a ni.
Premier League club lian Manchester United player te hlawh hi a inang lo hlawm hle a, a hlawh hnem ber chuan kar khatah £375,000 a hlawh pha a, kar tin £120,000 hlawh te pawh awmin, a tam zawk chuan hei aia hniam hi an hlawh hlawm.
Hlawh inang lo tak tak an nih rual hian thla khat chhunga an hlawh atanga 30% chu coronavirus dona atan National Health Service hnena hlan an remti hlawm a. He pawisa hmang hian Manchester khawpuia damdawi in vela hri leng dona kawngah hma an la dawn a ni.
United chairman Ed Woodward chuan club captain Harry Maguire chu player te hlawh atanga pawisa thawh khawm chungchang hi a sawipui a. Maguire chuan senior squad te chu a sawipui ve leh a, an sawiho hnuah lungrual takin an hlawh atanga 30% thawh chu an remti a ni.
Tun hnaia hri leng karah footballer te sawiselna leh phutna a nasa hle a, British Health Secretary Matt Hancock pawhin footballer te chuan hri leng dona kawngah eng emaw tak an tih ve tul a tih thu a lo sawi chhuak tawh a. Gary Lineker chuan footballer ho hi chhanin, engtin emaw hma an lak ngei a rin thu a sawi a, amah pawh hian BBC atanga thla hnih hlawh £1.75 million chu British Red Cross hnenah a pe dawn a ni.
Football ngainatu tam tak chuan footballer hausa tak takte chu nuamsa takin an awm vel mai mai a, anmahni ruaitu club chuan harsatna nasa tak an tawk thung a, hetiang te pawh hi an veipui lem lo niin an chhuah hial a ni.
Hetianga footballer te demna leh sawiselna a awm chhoh takah chuan inhnialna a chhuak zui nghal vat a, Premier League player hlui David Cotterill chuan, “UK ah hian millionaire hi 2.5 million vel an awm a, Premier League ah hian player 512 an awm thung a. Hetiang a nih lai hian footballer te chu pawisa thawh tur te, an hlawh sat thla then turin an phut em em mai a ni,” a ti.
“Footballer te an phutna hi a awm ve reng tho a. Chutih rual chuan anni aia a let eng emaw zata hausa hi tam tak an awm a ni tih hi hriat tel a tha khawp mai. Eng emaw hlek thleng se, footballer te hi sawi lan hmasakah hian an tang fo ringawt a, hei hi a dik ber lo,” tiin a sawi.
Manchester United player hlawh hnem zualte:
David de Gea - £375,000
Paul Pogba - £290,000
Anthony Martial - £250,000
Marcus Rashford - £200,000
Harry Maguire - £189,904
Juan Mata - £160,000
Luke Shaw - £150,000
Fred - £120,000
Victor Lindelof - £120,000
Nemanja Matic - £120,000