Kum hnih leh a chanve an inrawih hnuah Manchester United chuan Erik ten Hag an ban ta.

United board te thutlukna hi thawhtanni zing lamah Ten Hag hrilh a ni a, West Ham laka an tlawm hnu darkar 24 pawh tling loah Man United chuan Ten Hag an ban ta a ni.

Tun nipui laia Ten Hag-a'n coaching staff zinga a lak luh Ruud van Nistelrooy chu United chuan interim manager atan an chhawr rih ang.

Competition hrang hranga an game hnuhnung 8-ah vawi khat chiah hnehna an chang. Vawi 2 an chak lo a, vawi 5 lai an khingpui an inhnehtawkpui.

Tun season Premier League-a an game 9-ah vawi 3 chiah hnehna an chang a, vawi 2 an khingpui inhnehtawkpuiin vawi 4 an chak lo. Goal 8 chiah an khung a, goal 11 lai an chhuah. An goal difference chu -3 a ni.

"Erik ten Hag chuan Manchester United first team manager nihna a kalsan.

"April 2022 khan kan ruai tan a, domestic cup pahnih, Carabao Cup (2023) leh FA Cup (2024) te min chawipui.

"Kan hnena a awm chhunga a hnathawh zawng zawngah Erik-a chungah hian lawmthu kan sawi a, a kal leh zelna turah duhsakna kan hlan a ni," tiin Manchester United chuan thuchhuah an siam.

Tun nipui lai khan United chuan kum khat dang atan contract an ziahpui leh a nih kha. Mahse season bul a tan tha lo a, Europa League lamah pawh vawi thum an khelh tawh atangin chak an la nei lo a, an khingpui an inhnehtawkpui vek.

Old Trafford-a a luh atangin ten Hag hian player thar lei nan sum a hmang hnem hle. Tun nipui bazarah ngawt pawh khan Matthijs de Ligt, Leny Yoro, Joshua Zirkzee, Manuel Ugarte leh Noussair Mazraoui te lak luh nan £205million vel sum a hmang.

A sum hman ngaihtuahin, result tha a hlawhchhuah pui thei lo a, United board lam chuan a lakah dawhtheihna an lantir thei ta lo a ni.

Manchester United hian manager thar an zawng nghal char char dawn a, tun dinhmunah chuan tu nge an ngaihven tih sawi chat a la har. Hetih lai hian media te chuan Barcelona boss hlui Xavi chu Old Trafford-a inpu lut thei tur zinga langsar ber niin an ngai.