​Man of the match nihna Messi-a'n hnawl

16th June 2015, 07:06PM

Copa America 2015-a an match hmasa berah Argentina chuan si hnih faia hma an hruai zet tawh hnuah second half-ah Paraguay an inhnehtawk pui. He match-ah hian 29th mins-ah Aguero chuan goal hmahruai a khung a, 36th mins-ah penalty atangin Messi chuan Argentina goal hnihna a khung.

Second half-ah Valdez leh Barrios chuan Paraguay tan goal an khung a, 2-2 in an inhnehtawk ta a ni. MasterCard man of the match atan Argentina captain Messi chu thlan ni mahse Messi hian he lawmman hi a lo hnawl a, inkhelh zawha dressing room-a Man of the match atana an thlang tih an va hrilh hian Messi chuan a duh loh thu a hrilh hnuah Official-te chuan Argentina player tu emaw berin dawng se an tih laiin dressing room boruak a hot deuh avangin Argentina player te hian man of the match hi an hnawl ta a ni.

MasterCard man of the match atan Paraguay forward Nelson Haedo Valdez chu thlan a ni ta zawk a. Inkhelh zawhah Messi hian Press conference a hmachhawn lo zui bawk a ni. South American federation chuan Messi chu hemi chungchangah hian an hrem dawn loh thu an sawi ve nghal bawk a ni.

Messi chuan reporter hnenah si hnih faia hma an hruai hnua an inhnehtawk pui leh tak si avangin hrehawm an tih thu leh an game chuan awmze nei deuh an mamawh thu a sawi rualin Nilaini zinga an match turah Uruguay chu hneh ngei an tum dawn thu a sawi chhuak a ni.

photo : Reuters

Copyright © inkhel.com 2024. All rights reserved.