15 Apr 2019 07:59

inkhel

Man of the Match ni hnem ber Lionel Messi

Lionel Messi chu tun season chhungin Europe khawmualpuia league lian pangaa khel player zingah ‘Man of the Match’ atana an thlan ngun ber a ni.

Barcelona captain Lionel Messi chuan tun season a hmang tha hle a, inelna hrang hrangah goal 43 ngawt mai a thun tawh bakah mi goal thun tur vawi 12 a siamsak tawh bawk a. Goal thun hnem lamah han lehpel thei tur an awm hmel loh hle a, heti a nih chuan European Golden Shoe chu a vawi rukna atan a dawng leh thei dawn a ni.

Argentine superstar chuan Barcelona chu La Liga hmahruaitu a nihpui mek a, UEFA Champions League lamah pawh quarter final a thlenpui a, Manchester United chu first leg an khelh tawhah an hneh nghe nghe a. United an hneh tum hian Messi chuan goal thun lo mahse Luis Suarez goal thun tur chu a siamsak tho a, mahse a tawpah chuan Luke Shaw own goal angin an ziak lut ta thung a ni.

Tun hnaia WhoScored.com leh GiveMeSport te’n an tarlan danin Lionel Messi hi tun season chhungin Man of the Match atan an thlang hnem ber tawh a. Tun season chhungin La Liga bikah game 26-ah bul a tan tawh a, heng zinga game 15-ah hian Man of the Match atan hian an thlang tawh a ni.

Chelsea star Eden Hazard leh Lille star Nicolas Pepe te chu a chungnung pathum zingah an tel pha bawk a, Eden Hazard hi Man of the Match atan hian vawi 13 an thlang tawh a, Nicolas Pepe chu vawi 11 an thlang tawh bawk a. Juventus star Cristiano Ronaldo chu palina niin, Italy a pan hnuah Man of the Match atan hian vawi 9 an thlang tawh a ni.

Valencia star Daniel Parejo chu panganaah a awm a, paruknaah hian vawi riat an thlan tawh Manchester City star Raheem Sterling a awm a. A hnuaiah hian Cagliari player Alessio Cragno (7), Paris Saint-Germain star Kylian Mbappe (7), Tottenham Hotspur striker Harry Kane (6) leh Borussia Dortmund rawlthar Jadon Sancho (6) te chu an awm bawk a ni.