Son-a shot tha lutuk a dan avang khan Manchester City an champion tiin mi tam takin an sawi, kha game-ah khan Son khan goal khung ngat selang chuan Arsenal an champion ngei ang le.

Manchester City 2nd goalkeeper pawimawh Stafan Ortega chuan Etihad Stadium-ah contract thar a ziak ve leh ta e.

Kum 31 mi hian Manchester City-ah kum 2026 thlenga cham turin contract thar a ziak a, "Manchester City-a hun rei zawk ka cham thei tur hi ka hlim hle a ni.

"He football club hian player tha ni tura kan mamawh engkim min pe. Ni tin hian chona thar min hmachhawn tir a, min fuih phur a, kum hnih ka cham chhung pawhin nasa takin hma ka sawn a ni.

"Ka chhungte pawh England-ah hian an inbeng bel ve tawh a, hemi hmun hi ka ngaina a ni. Contract thar ka ziak ta a, season thar leh a hnu leh zel atan ka rilru zawng zawng ka pe leh tawh e," tiin Ortega chuan a sawi.

Kum 2022 khan Ortega hian free transfer-in Man City a pan, German hian City tan 2023-24 season khan game 20 a khel a, Premier League a zawna vawi 4 an champion theih nan tha nasa takin a thawh ve a ni.

Tottenham an hmachhawn tumin Ederson a inhliam, Ortega a lut a, Son Heung-min shot chu tha lutukin a dan sak, kha kha Arsenal champion loh chhan ni tein an sawi ve bawk.

Etihad a zawm tirhin kum 3 chhung atan contract a ziak a, City tan competition hrang hrangah game 34 a khel tling ve tawh a ni.