Manchester City chuan tun nipui bazar chhunga an lakluh tum ber pakhat Jack Grealish chu an dawr tan tawh tih Sky Sports chuan a tarlang.

Aston Villa hian an captain hi chhuah tir an phal lo hle a, an hnenah kum li daih lai contract la nei mahse, tunah hian contract thar ziahpui an tum leh mek niin Sky Sports chuan a tarlang tel.

City hian tunkar tir lam khan Grealish-a chungchangah Aston Villa hi inbiakna an neihpui tan tawha, tunah hian inbiakna an la kalpui chhunzawm reng nia sawi a ni bawk a ni.

Villa hian Grealish hi an hralh dawn a nih chuan a manah pound maktaduai 100 tal an duh nia sawi a ni a, heti ang zat hi City hian an thehchhuah phal a rinawm.

City leh Villa-te hi Grealish-a manah an inrem thei a nih chuan, City hian mimal thilah pawh kum 25 mi hi an inrempui theih a beiseiawma, City hian kar khatah pound 200,000 hlawh tir an inhuam niin chanchinbu thenkhat chuan an tarlang.

City hian Grealish bakah hian Tottenham striker Harry Kane pawh lakluh an duha, Kane leh Grealish lakluh nan hian pound maktaduai 200 vel an dah hrang tawh niin chanchinbu mite chuan an lo tarlang tawh a ni.