Manchester City chuan an huang an zauh belh zel a, club neitute chuan team eng emaw zat an neih tawh hnuah Chinese club Sichuan Jiuniu FC an lei belh leh tawh.

City Football Group (CFG) chuan Chinese third division club Sichuan Jiuniu chu leiin, China Sports Capital leh robotics firm UBTECH te nen a neitu nihna an neiho a ni.

City chief executive Ferran Sorriano chuan, “Vawiinah hian City Football Group chuan pen khatin hma kan sawn belh leh ta a, bung thar duhawm tak kan kai leh ta chiah mai a. China hi football lamah chuan an lian hle a, sumdawnna hmunpui tha tak mai a ni a, hun eng emaw atang khan kan lo thlithlai tawh a ni,” a ti.

“China ramah hian football hmakhua a eng hlein kan hria a, Thil thui tak thlir chungin Sichuan Jiuniu FC hi nasa taka tan lakpui kan tum a, tun aia dinhmun sang daih zawka hlan kai hi kan tum a. China rama football thiamte chawikanna lamah theihtawp chhuah kan tum a, hetianga kan thil tum hi kan dah pawimawh viau a ni,” a ti bawk.

A sawi zelnaah, “Kan buaipui hmasak ber tur chu kan inkhelh dan tihhmasawn hi a ni ang a. Kan tawn hriat neih angte leh kan thil lo hriat tawhte hmangin Sichuan Jiuniu hi kan hrual chho ang a, kan club tantute nen kan inkar boruak pawh a tha thei ang ber nihtir kan tum bawk ang a, China ramah hian tun aiin miin he club hming hi an hre lar chho zual zel dawn a ni,” a ti.

Sichuan Jiuniu FC hi CFG hnuaia club pasarihna an ni chiah a, Premier League champion Manchester City bakah CFG hian Melbourne City, New York City leh Uruguay club pakhat Club Atletico Torque te chu an nei tawh a, Girona leh Yokohama F. Marinos ah te pawh neitu nihna hi an nei tel ve bawk a ni.

China Sports Capital chuan December 2015 atang khan City Football Group-ah hian share an nei tan a, UBTECH chu 2016 atangin Manchester City hian sumdawnna lamah an kawp tan bawk a ni.