Manchester City chuan kar hautak zet mai an hmachhawn hnuin Pathianniah Aston Villa chu anmahni khelmualah 3-1 in an lo hneh lo thei a, hmahruaitu Arsenal an hnaih leh sawt.

Villa nen an inhmachhawnnaa City goal hmasa ber khungtu Rodri chuan City chuan khelmualah an sawifel thin niin a sawi.

City defensive midfielder Rodri hian inkhel bul tan atang min. 4-na lekah City hmahruaina goal hi a thun a, Ikay Gundogan leh Riyad Mahrez te'n rawn thun belh lehin, half-time a nih meuh chuan City hian 3-0 in hma an hruai der tawh.

Kum 26 a upa Rodri chuan BBC Sport in an kawmnaah heti hian a sawi, "Football chungchang chauh kan sawi, khelmual kan pan a, chutah chuan kan sawifel thin. Khelmual pawn lama thil thlengah kan buaina tur a awm lo," tiin a sawi.

Tun kar Nilaini zan zanlaiah hian City hi hmahruaitu Arsenal khelmualah an leng lut dawn a. Gunners hian Everton an draw avangin City nen an inhmachhawn hunah hian City hi an chak a nih chuan hmahruaitu an ni thei dawn.

Arsenal nena an inhmachhawn tur chungchang pawh hi sawiin Rodri chuan, "Hmahruaitu nih theihna hun tha kan nei. Kan zia dik tak hmuhtir turin leh eng team nge kan nih hmuhtir turin kan pan ang.

"An khelh tha hle tih kan hre theuh ang, mahse keini pawh hian tha takin kan khel ve thei. Inkhel hmuhnawm tak a ni dawn a, indona hmuhnawm tak a ni bawk ang. Table-ah a chung ber dinhmun hauh theihna hun tha kan nei dawn a, chu chu kan tum ber pawh a ni," tiin a sawi tel bawk a ni.