Ningani zan zanlai khan Manchester City leh Wolves te chuan Rayan Ait-Nouri chungchangah inremna tluantling an nei a, Ait-Nouri chu Etihad Stadium-a medical nei turin an inbuatsaih nghal.

Tun thla tir khan City chuan kum 23 mi left-back hi an ngaihven a, Algeria international manah hian City leh Wolves te chu €40million (£33m) in an inrem niin The Athletic chuan a tarlang a, City hian kum 5 chhung atan contract an ziahpui ang a, hetah hian pawhsei theihna ziah a ni dawn bawk.

Ait-Nouri hian season 5 chuang Wolves-ah hun a hmang a, game 157 a khel ve hman. Kum 2020 khan French club Angers atangin loan-in Wolves a zawm a, a hnuah a nghetin a zawm chhunzawm.

Pep Guardiola chuan central defender Jasko Gvardiol leh Nathan Ake te chu veilamah a chhawr thin a, tunah chuan natural left-back an mamawh tih a hre chiang a, Ait-Nouri hi a la dawn ta a ni.

Season liamta khan Ait-Nouri hi Wolves tan left wing-back ah te a khel thin a, 2024-25 season khan competition hrang hrangah goals+assits 12 a nei a, tak-ons vawi 63 lai a nei bawk.

City chuan Club World Cup-a Ait-Nouri chhawr hman an tum avangin hmanhmawh takin transfer an buaipui nghal a ni. June ni 14-a tan tur Club World Cup-ah hian City chu Group G-ah awmin, Wydad AC, Al Ain leh Juventus te nen an awm ho.

Wolves erawh an inthawm that ve deuh chu a ngaih dawn hmel. Matheus Cunha chuan Manchester United a pan san a, tunah Ait-Nouri a chhuak leh dawn ta bawk a, nipui bazarah hian an inlei ve leh a ngai dawn a ni.