27 Jan 2020 10:32

bakteaJr.

Mizo tlangval

​‘Mamba out’

Kan hriat tawh theuh angin NBA legend Kobe Bryant chuan Sunday zing (kan sanaah chuan Sunday zan) khan helicopter chesualah a nunna a chana, he helicopter chesualah hian Kobe bakah Kobe-a fanu kum 13 mi Gianna pawh telin a nunna a chana, midang pasarih dangin an nunna an chan bawk.

Los Angeles-ah Kobe aia lar hi an awm lo tih hiala an sawi thin a ni a, Kobe hian a basketball career pumpui chu Los Angeles Lakers tan hmang zovin, Lakers tan hian kum 20 chhung ngawt a khela, kum 2016 April thla khan basketball khelh a chawlhsan.

Kum 41 mi Kobe hian veivah nan private helicopter hman a ching em em a, tun tuma erawh vanduaithlak takin helicopter hi Calabasas khawpui California-ah che sualin, a chhunga chuang mi 9 te chuan nunna an chan veka, Kobe hian a nupui Vanessa bakah a fanu dang pathum Natalia, Bianca leh Capri-te a kalsan a ni.

A tirah helicopter-a chuang te hi mi panga anga sawi a ni a, Kobe-a fanu pathum te an tel ve anga sawi ni bawk mahse thuchiang zawk hriat a ni tawha, Kobe leh a fanu Gianna bakah midang pasarih te an chuang.

Basketball player leh player hlui te chuan Kobe an ui thu an sawichhuak nasa hle a, anni bakah hian celebrity hrang hrang bakah Europe-a football team hrang hrang te chuan Kobe an ui zia hi social media hmangin an tarlang nasa hle.

Kobe hi NBA player zinga ropui ber pakhat a ni a, All Star team-ah kum 20 a inkhelh chhungin vawi 18 a inlan. Kum 1996 draft khan thlan niin NBA-ah vawi 5 a champion tawh a, NBA Final MVP-ah vawi 2 thlan ni tawhin kum 2008 khan League MVP atan thlan a ni bawk. Basketball a chawlhsan hian Lakers chuan Kobe-a jersey number 8 leh 24 te chu a chawlhtir ve a, hetianga jersey chawlhtir hi Lakers-in hei chauh hi an nei nghe nghe a ni.

Kobe hi NBA player ni tawh leh ni mek te zingah lar ber pawl a tih loh theih lova, basketball ngaina lo tute pawhin a hming tal an hriat chin a ni a, infiamna khawvel tan chuan Kobe kan chan hi channa nasa tak a ni.

Kobe Bryant-a chanchin tlangpui:

  • Kobe Bean Bryant tih hming puin August 23, 1978 khan Philadelphia, Pennsylvania-ah a piang a, unau pianpui hmeichhia pahnih a nei.
  • Kobe hi ft 6'6 a sang a ni.
  • Kobe Byrant-a pa Joe Bryant hi NBA player hlui a ni a, Kobe-a Basketball nun kawng sial saktu pawimawh tak a ni kan ti thei awm e.
  • Kum 1996 khan Lower Merion High School, Pennsylvania atang NBA-ah draft luh niin round 1 a player thlan sawm leh pathumna a ni a, Charlotte Hornets chuan thlang mahse Lakers hnenah an trade nghal.
  • NBA a draft a nih hian kum 17 chauha upa la nih avangin a nu leh pa te'n contract an sign sak.
  • Kum 1997 khan NBA Slam Dunk competition-ah a champion nghal.
  • Kobe hian NBA game 1,566 zet a khel hman.
  • Kum 2007-08 khan NBA Most Valuable Player atan thlan a ni.
  • NBA All-Star Game MVP atan tum li thlan a ni.
  • Kobe hi NBA-ah vawi 5 zet a champion hman.
  • US Basketball team chu Olympic-ah tum hnih a champion pui hman bawk ( 2008, 2012).
  • NBA history-ah team pakhat tana season 20 khel thei awmchhun a ni.
  • NBA history a point score hnem ber pathuman a ni a, point 33, 643 lai a score hman a ni.
  • NBA game 25 zetah point 50 a score tling thei a, Wilt Chamberlain(118) leh Michael Jordan(31) te chiah a tluk loi.
  • NBA Play-offs a point score tam ber pathumna a ni bawk a, point 5,640 zet a score hman.
  • NBA a khelh chhung khan Kobe hian minute 48,655 zet Court chhungah hun a hmang.
  • NBA All-Star Team-ah tum 18 zet thlan a ni.
  • Utah Jazz lakah khan Kobe hian FGA tum 50 a nei a, Season 30 kalta chhunga attempts ngah ber ala ni.