Male Athlete of the Year atan Christian Pulisic an thlang

13th December 2019, 09:12PM

Christian Pulisic chu U.S. Soccer’ Male Athlete of the Year atan an thlang a, he chawimawina dawng nawn thei naupang ber a ni.

Chelsea forward Christian Pulisic hian chawimawina dawng thei turin Seattle Sounders midfielder Jordan Morris leh Schalke midfielder Weston McKennie te chu a khum a. Pulisic hian vote 38% a hmu a, pahnihna Morris chuan 35% hmuin pathumna McKennie chuan 13% a hmu a ni.

Chawimawina dawng thei tura chhawp chhuah dangte chu New York Red Bulls defender Aaron Long, Fulham defender Tim Ream leh Columbus Crew forward Gyasi Zardes te an ni a. Heng player parukte hi club leh ram tana an chet that dan an en hnua an thlan chhuahte an ni.

National team coach leh national team player te chuan Male Athlete of the Year thlang tur hian vote an thlak a. Anni bakah hian US Soccer board of director te, US Soccer Athletes’ Council, American soccer league (MLS leh USL) head coach te, media member leh player hlui te pawhin vote hi an thlak bawk a ni.

2017 kumah khan Christian Pulisic chu Male Athlete of the Year atan an lo thlang tawh a, hemi tumah pawh hian chawimawina dawng thei naupang ber a lo ni tawh a. Kuminah kum 21 leh ni 85-a upa niin, he chawimawina dawng nawn thei zinga naupang ber a ni leh a. A hmaa record awm sa, 2004 kuma kum 22 leh ni 293 a upa Landon Donovan-a record lo siam tawh chu a khum ta a ni.

A vawi hnihna atana Male Athlete of the Year atana thlan zingah Christian Pulisic hi pasarihna a ni a, Landon Donovan chuan a dawng ngun ber a, vawi 4 a dawng tawh a. Clint Dempsey leh Kasey Keller te chuan vawi 3 ve ve an dawng tawh a, Jozy Altidore, Marcelo Balboa leh Tim Howard te chuan vawi 2 theuh an dawng tawh bawk a ni.

2019 chhungin Christian Pulisic chu ram leh club tan a che tha chho hle a, USA team tan goal 5 a thun tawh a, mi goal thun tur vawi 3 a siamsak tawh bawk a. Gold Cup ah an ram team chu final a thlenpui a, he tournament-ah hian Best XI zingah an thlang tel nghe nghe a ni.

August thlaah khan Premier League club Chelsea lam a pan a, manager Frank Lampard kaihhruaina hnuaiah khelhna hmun a chang chho thei zel a. Game 20 a khelh tawhah goal 6 thun tawhin, mi goal thun tur vawi 5 a siamsak tawh bawk a. October 26 ah khan Burnley lakah hattrick a siam a ni.

Kumin kum tir lamah khan Pulisic hi Bundesliga club Borussia Dortmund ah loan in a kal a, inelna hrang hranga game 13 a khelhah goal 3 thunin, mi goal thun tur vawi 2 a siamsak a ni.

Copyright © inkhel.com 2024. All rights reserved.