Sepang-a Malaysian MotoGP intlansiak hmuhnawm takah Pedrosa pakhatna a ni a, Lorenzo chu pahnihna niin Championship-a hmahruaitu Valentino Rossi chu pathumna a ni.
He intlansiakah hian thil thleng zen zen lo a thleng tlat mai. Lap 13-na an tlan mek laiin Rossi chuan Marquez a tlawh thal a, hemi avang hian Rossi chu hrem a ni ta a, intlansiak hnuhnung berah a hnung ber atangin a tlan tan dawn ta a ni.
Championship-ah Rossi chuan 312 points neiin hma a hruai, Lorenzo chuan 305 points neiin pahnihna a ni mek, November ni 8-a intlansiak hnuhnung ber Valencia-ah Rossi hi pahnihna a nih chuan a champion thei dawn thova, hetih lai hian a hnung ber atanga bul tan tur tan chuan a huphurhawm ve dawn hle a ni.
Rossi leh Marquez an inum na hle a, an inlehpel zak zak a, Lap 13 turn 14-ah Rossi chuan a khup a kau a, pawn zawka awm Marquez chu a thal ta a ni. Penalty inpek danah hian point thum a awm a, Rossi hian penalty point thum hmuin intlansiak leh hmasak berah a hnung ber atangin bul a tan dawn ta a ni.
World Champion vawi 9 lai lo ni tawh Valentino Rossi hi mipuite tan hlawh tak a ni a, tunhma pawhin hetiang hi kan lo hmu zauh zauh tawh, mahse Rossi hian hrem a la tawk ngai lo, kumin hian penalty point thum a hmu ta nge nge a ni. Rossi leh Marquez inkar hi Australian GP atang daih tawh khan a intan niin a lang.
October ni 18-a Australian GP-ah khan Rossi chuan Marquez chu a champion loh nan a bei luiah a ngai a, Sepang-a intlansiak zawhah pawh Rossi a thinrim hle, "Marquez khan kan pahnih (Lorenzo nen) min bei lo, keimah chiah min bei a ni. A tlan dan hi a fair lo hle a ni, Lorenzo chak tir a tum hle, mimal thilah ka chungah a thinrim hle a ni," tiin a sawi.
Rossi chuan Marquez chu a hnampui Lorenzo champion tir a tum lutuk niah a puh a, Malaysian GP-ah pawh Lorenzo tan kawng a hawn hnuah Marquez chuan Rossi a inelpui ta niin a lang a nih kha. Rossi chuan Marquez tluk dan chu mak a tih thu a sawi a,
"Marc khan ka hun tam tak a la hek tawh, turn 14-ah khan line tha taka ka lak theih nan leh amah ka dan theih nan tlemin ka tawlh chhuak lui.
"Min rawn hnaih ta hle a, a handlebar khan ka ke a rawn tawk, ka ke a tawlhsan phah nghe nghe. Khatiang intawh mai maiah bike a tlu thei lo. A tum chu a hlen ta ngei alawm, championship chu amah vangin ka hloh dawn ta a ni," tiin Rossi chuan a sawi a ni.
#SepangClash - #MalaysianGP#SepangClash! http://bit.ly/SepangClash-MalaysianGP-f
Posted by MotoGP on Sunday, October 25, 2015
Malaysian GP result
1. Dani Pedrosa (Spa/Honda) 40 min 37.691 secs
2. Jorge Lorenzo (Spa/Yamaha) +3.612 secs
3. Valentino Rossi (Ita/Yamaha) +13.724 secs
4. Bradley Smith (GB/Yamaha) +23.995 secs
5. Cal Crutchlow (GB/Honda) +28.721 secs
Moto GP standings
1. Valentino Rossi (Ita/Yamaha) 312 pts
2. Jorge Lorenzo (Spa/Yamaha) 305 pts
3. Marc Marquez (Esp/Honda) 222 pts
4. Dani Pedrosa (Spa/Honda) 190 pts
5. Andrea Iannone (Ita/Ducati) 188 pts
pictures credit : AFP