Mahni tihsual vanga goal chhuah hnem ber Arsenal

08th September 2019, 01:09AM

Arsenal chu Premier League club zingah mahni tihsual tuar nasa ber an ni a, an tihsual vangin an lamah goal an chhuah hnem ber mek a ni.

2017-18 season tan tirh atang khan Arsenal hian tihsual an ngah chho hle a, hetianga chetsual an neih vanga an lama goal lut pawh a pun belh zel bawk a. Pathiannia Tottenham Hotspur nen North London derby an khelh pawh khan an tihsual vangin an lamah goal an luhtir leh a ni.

Bernd Leno chetsual vangin Christian Eriksen chuan goal a thun phah a, kha kha game 80 chhungin anmahni tihsual vanga goal 29 an chhuahna chiah a ni.

German goalkeeper Bernd Leno hian tun hnaiah chet fuh loh a nei chho nual tawh a, a tihsual vang hian an lamah goal pawimawh tak tak 6 ngawt a luh phah tawh a. Season hmasaah pawh game 22 chhung hneh loh nei loa an kal tluang chu Leno tihsual vang hian a tawp phah a. Southampton nen an inkhelh tumin ball an rawn vawrh chu a chhut sual a, hei vang hian Southampton chuan hun tawp dawn hnaihah an chakna goal an thun phah a ni.

Gunners hian Bernd Leno an enthlak lai vel khan tihsual a nei thin tih hi an hmuh hmaih a nih hmel a. October 2015 ah khan Bayer Leverkusen tana a khelh laiin Leno hian an pawlte backpass chu a lo pet thelh a, ball chu anmahni goal-ah a lo lut tawh a ni.

Ball a pet thelh atanga thla khat hnuah UEFA Champions League-ah BATE Borisov nen an inkhel a, hetah hian BATE Borisov in an goal lama na vak lo leh harsa lo taka ball an pet phei chu a lo man fuh chiah lo a, an goal-ah a lut bawk a ni.

Leno chauh lo pawh hi tihsual nei hnem tak mai pakhat a awm bawk a, Petr Cech khan 2017-18 season chhung ringawt pawh khan a tihsual vangin anmahni lamah goal vawi 6 ngawt a luh phah.

Vawi 4 ngawt Chelsea chu Premier League title a lakpui hnuah Arsenal a zawm a, North London-ah beisei angin a che tha thei meuh lo a ni ber.

Granit Xhaka chu tihsual ngah langsar zual pakhat niin, Swiss midfielder tihsual vang hian Arsenal chuan goal 5 chu an chhuah phah bawk a. Spurs nen an inkhelh tum khan a chetsual tharlam ber a thleng a, penalty a chawi a, Tottenham chuan 2-0 in hma an hruai theih phah a. Shkodran Mustafi chu Xhaka dawt chiahah hian a awm bawk a, a tihsual vangin Gunners chuan goal 3 an chhuah phah tawh a ni.

Arsenal hian anmahni tihsual vangin goal 29 an chhuah tawh a, Southampton chuan an tihsual vangin goal 24 an chhuah a, Bournemouth chuan anmahni tihsual vang hian goal 23 an chhuah tawh bawk a ni.

Copyright © inkhel.com 2024. All rights reserved.