12 Aug 2019 01:25

bakteaJr.

Mizo tlangval

​Maguire kha lungpui ang mai a ni – Mourinho

Sky Sports pundit thar Jose Mourinho chuan Manchester United defender Harry Maguire chu Chelsea laka a khelhdan fakin, lungpui ang maia khawng a nih thu a sawi.

Harry Maguire hi kar hmasa mai khan United hian khawvela defender manto ber ni turin Leicester City atangin an laluta, a manah pound maktaduai 80 sengin, mi tam takin United hian an seng hnem mah mahah an ngai.

Maguire hi Chelsea lakah; United tana a game hmasa berah hian a khel tha hle a, Chelsea a hmachhawn anga a khel chho zel a nih chuan United hi an man an sen zatah an inchhir lo hle dawn ni pawhin a lang.

Manchester United leh Chelsea manager hlui Mourinho chuan Maguire-a chungchang sawiin, “Lungpui ang maiin a khawnga, goal nawr duh mah ila kan hnunglam a pawh kan hlauh chuan inrintawkna neih a harsa em em thin. Mahse tlar hnungah thil rinawm tak a awm tih hriat chuan inrintawkna nasa tak kan neih phah thin a ni.

“Lindelof hi player tha tak a ni thei tih ka lo sawi tawh thin a, Maguire nen hian partnership tha tak an siam theih a beiseiawm hle a ni,” a ti.

United hian Chelsea hi si li fai laiin Old Trafford-ah an lo hneha, Marcus Rashford, Anthony Martial leh Daniel James-te chuan Red Devils tan goal an khung. Mourinho chuan, “ Result tha tak a ni a, mahse ka ngaihdan ka sawi tawh kha ka ngaihdan a la ni reng; United hi an champion loang. Mahse, season tha tak erawh an nei thei a ni,” tiin a sawi belh bawk.