13 Aug 2019 12:25

bakteaJr.

Mizo tlangval

​Maguire hian Van Dijk a ang thei – Jonny Evans

Leicester City centre-back Jonny Evans chuan Manchester United-in kar hmasa lawka Leicester atanga an lei Harry Maguire chuan Liverpool defender Virgil Van Dijk chu a ang thei tih a sawi.

Manchester United-a a awm laia Premier League title pathum la thei Evans hi season hmasa khan Leicester-ah Maguire nen an inkawpa, an che chhe lem lova, an inhriat chian thawkhat pawh a rinawm. Evans-a club hlui Manchester United chuan kar liamta khan Maguire hi pound maktaduai 80 laiin Old Trafford-ah an lalut a, khawvela defender manto ber a ni.

Maguire hian United tan a game hmasa ber a khel tawha, Premier League-a United game hmasa berah Chelsea hmachhawnin, Maguire hi a khel tha hle a, Chelsea leh United manager hlui Jose Mourinho chuan lungui ang maia khawng tha a nih thu hial a lo sawi tawh bawk.

Maguire hma chiah hian Dutch defender Van Dijk chu defender manto ber a ni thin a, Liverpool-in nikuma January-a an lei atangin Reds defence phui zia kan hre theuha, season liamta khan Champions League-ah hial champion-in, Van Dijk an innghah pakhat a ni a tih loh theih loh.

Evens chuan Maguire leh Van Dijk-a chungchang sawiin, “Harry hian Van Dijk a ang chho thei tih ka hria a, an pahnih hian an game khelhdan pawh khaikhin a ni chho va, an pahnih hian ball an keng thei ve ve bawk. Harry hi a tlanchak em em a, mahse hei hi miin an hmuh hmaih fo va, tharum a ngahin ball kangah a tha viau bawk.

“An man zat hi mi zawng zawngin an khaikhin dawn a, mahse tunlai angah chuan an man zat hi khaikhin vak chi pawh a ni tawh lo. Harry an enna tur ber chu a khelhdanah a ni a, Manchester United tana siam a ni a, a kal hi ka lawmpuia, hlauhthawnna eng mah ka neihpui lo.

“United player mamawh tak a ni a, a mizia pawh a ngainatawm hle. United-ah a lar dawn a, player tha tak a ni bawk a ni,” a ti.