England head-coach Gareth Southgate chuan Manchester United captain Harry Maguire-a thlavang a hauh a, English defender hi level sang bera khel thei a nih thu a sawi.

Kum 29 mi Maguire hi sawisel a ni nasa hle a, England tan khel tha thin mah se, club lamah erawh khelh chhiat chang a ngah hle a, mi tam tak chuan England tana khel tlak lovah an ngai nghe nghe a ni.

Kum 2018 FIFA World Cup-a England-in semi final an thlen tum khan Maguire hi an player pawimawh tak a ni a, nikum Euro-ah pawh England tan a pawimawh leh viau bawk.

Maguire chu England defender neih that ber a la nih reng leh nih reng loh chunchang zawhna chhangin Southgate chuan, “World Cup semi final leh European Championship final min thlenpui tu a ni a, level sang ber khel thei a ni tih hi hai rual a ni lo.

“Nikum pawh khan kan tan a khel tha hle a, an club lamin hun khirh an paltlang mek a, chhan tam tak a awm thei. Kum hnih vel player te an khelh chhiatin team-ah an awm reng dawn tihna a ni hauh lova, an position-a player awm dana zir te pawh a ni fo thin,” tiin a sawi.

Kum 2017 khan Maguire hi England tan a inlan tan a, a ram tan hian game 41 a khel tawh a, goal 7 a khung tawh a ni.