16 May 2019 07:03

inkhel

Magic leh Bird te Lifetime Achievement Award an hlan dawn

Magic Johnson leh Larry Bird te chuan NBA chu khawvel hriata an tihlar nasat em avangin Lifetime Achievement Award an hlan dawn.

Nilaini khan NBA leh Turner Sports te chuan Hall of Famer pahnih, 1992 US Olympic teammate te chu June 24 a NBA Awards an sem hunah chawimawina hi hlan an nih tur thu an puang a. 1980 chho vel khan Magic Johnson leh Larry Bird te zarah hian NBA chu khawvel hmun hrang hranga miin an hriat lar phah hle a ni.

1979 NCAA championship game-ah Magic Johnson leh Larry Bird te hi an inhmachhawn a. He inkhelah hian Magic Johnson leh a telna team Michigan State chuan Larry Bird leh a telna team Indiana State chu an hneh a. Hemi tuma inkhel hi tun thlengin college basketball inelnaah chuan TV a hlut hlawh berah an la thlang reng a ni.

Johnson leh Bird te chu hemi hnu hian an intawng ngun chho hle a, Johnson chuan Los Angeles Lakers a zawm a, Bird chu Boston Celtics lamah a kal thung a. 1980 chhoah khan Lakers chu vawi nga an champion a, Celtics chu vawi thum an champion thei bawk a. Anni pahnih hi mi ngaihven hlawh ber pawl an ni a, hemi zarah hian an pahnih inkar boruak pawh a that phah hle a ni.

An inkar boruak a that chhoh tak hnuah phei chuan an pahnih hian NBA chu hma lam an panpui nasa hle a. Khawvel hmun hrang hrangah he infiamna hian hriat a hlawh nasa lehzual a, basketball chu khawvela infiamna lar berte zingah an hlang kai a tih theih a ni.

Player pahnihte hi MVP atan vawi thum ve ve an thlang hman a, NBA player ropui zual 50 thlan chhuah zingah pawh an tel ve ve a. An pahnih hian Hall of Fame-ah vawi hnih ve ve an la lut a, mi mal anga an lak luh ve ve hnuah Barcelona khawpuia gold medal latu Dream Team-a an tel avang khan lak luh zingah an tel ve leh a ni.

Larry Bird chu a inkhelh tawh loh hnuah coach a ni zui a, Indiana Pacers president te a ni thei hial a. NBA chanchinah chuan MVP, Coach of the Year leh Executive of the Year ni thei awm chhun a la ni.

Magic Johnson chu Lakers coach a nih tawh bakah president te pawh a ni tawh bawk a; mahse, Bird ang em chuan a hlawhtling ve ta lo thung.

Bill Russell chu Lifetime Achievement Award dawng hmasa ber niin, 2017 khan he chawimawina hi an hlan a. 2018 ah chuan Oscar Robertson hnenah an hlan ve thung a ni.