Czech 10th seed Petra Kvitova chuan a tumpui Kiki Bertens chu hnehin Madrid Open title a la.

Madrid Open-ah hian Petra Kvitova leh Netherlands star Kiki Bertens te chu inkhelin, a chak zawk tur rin thiam har khawpin an khel chho a. A tawpah Kvitova hi 7-6 (8/6), 4-6, 6-3 in a chak a, a vawi thumna atan Madrid Open title a la a, 2011 leh 2015 te khan helaiah hian a lo champion tawh bawk.

Kuminah Petra Kvitova hi a che tha chho hle a, kum tir atangin bul a tan fuh a, title pali ngawt mai a la der tawh a. Madrid Open title a lak hma hian St. Petersburg, Doha leh Prague-ah te title a lo la tawh a ni.

Tennis khawvela a title 24-na la tur hian Kvitova chuan winner 39 leh unforced error 58 a nei a. Bertens hi tun hnaia final a luh vawi rukah vawi nga a chak a, kuminah Chaleston-ah title a lo la tawh a, Kvitova hmaah erawh a tum ang a hlen thei ta lo a. Final a luh avang hian ranking tharah chuan 15-na a ni thei ang.