Serena Williams chu tun season chhungin clay court-ah a la inkhel miah lo a, a bul tanna tur nia ngaih Madrid Open atanga a inhnuhdawh leh bawk avangin clay court a inkhelh a la hnaih leh rih lo.

Kum 36-a upa Serena hian kar leh atanga khelh tan tur Madrid Open-ah a tel loh tur hi a ti chiang tawh a. Nikum lawk khan fa a neih avangin inkhelh a chawlhsan lailawk a, tunah pawh hian tournament hmachhawn tur chuan a la inpeih loh thu sawiin, ngawrh zawka training chhunzawm rih a duh thu a sawi.

Nikum September thla khan vawi 23 ngawt Grand Slam single title la tawh Serena hian a fa hmasa ber a nei a. Kuminah a inkhel leh tan a, mahse beisei erawh a la pha lo hle a, Indian Wells-ah pre-quarter final a thleng a, March thla khan Miami Open-ah tel lehin first round-ah a tla nghal a ni.

Vawi hnih ngawt a lo champion tawhna Madrid Open-ah hian tel leh ngei tura ngaih a ni laiin a inhnuhdawh thu hi a rawn puang a. Hetia Serena a inhnuhdawh avang hian tournament director Manolo Santana chuan pawi a tih thu sawiin, chak zawka hma sawn tura a duh thu a sawi.

Manolo Santana chuan, “Helai hmunah hi chuan Serena tluka ropui hi an awm lem lo a, kan tournament tihlutu berte zinga mi a ni thin a, Caja Magica-ah hian kan la hmuh leh ngei kan beisei,” a ti.