Real Madrid leh Atletico Madrid chu player kum tlinglo an lakluh danah Fifa-in player lalut thei lo turin transfer window vawi hnih an hrem a nih kha. Real Boss thar Zidane tan a player duhzawng a lakluh theih loh tur ang bawkin Barcelona leh Real Madrid umphak tum Atletico Boss Simeone tan pawh channa nasa taka a ni ngei ang. Nimahsela Madrid khaw club pahnih hian tun January transfer window hian chuan player an lalut thei dawn tho a, buaina chu thlasik insawn hunlai a player lei tur vang lutuk thin a ni awm e. He hremna hian Madrid khaw club chauh ni lo Van Gaal-a hnuaia game hmuhnawm lo zet khel mek United pawh a nghawng nasa dawn hle kan ti thei ang.
Engvangin nge United a nghawng ngawt ang ?
United leh Real hi an player duhlai inchuhsak tum ve ve an ni. United-in world record fee niturin Spurs dawr mahse Bale-a'n Spain a pansan ta a nih kha. A season khat naah che tha viau mahse season hmasa a khelh that loh avangin fans ten an bei nasa hle a, a car te hial an bei a ni. Sum a buai lo United-in beidawn mai an tum lo. Bale lakluh tumin hma anla la reng a, nimahsela Real-in hremna an tawh takah chuan an player tha ber pawl Bale-a hralh hi thih hrehin an hreh ang. He hremna hian United-in forward tlanchak Bale lei an tumna kawng a hnawh phui a tih theih awm e.
Ronaldo United-ah a let leh dawn tih hi khawthlang chanchibu mite chaw tui ber a ni a tih theih awm e. Ronaldo hian Real tana goal thun hnem ber record a siam tawh avangin Real a chhuahsan mai ringtu an tam sawt hle. February thlaa kum 31 tling tawh tur Ronaldo hi tun hnaiah a tla hniam nasa hle a, Morrocan Kick-Boxer Badr Hari-a nen inkawp ang ten thu a thang hial a nih kha. Tun hnaiah Bale a rawn che tha chho leh tawh nen Madrid hotute chuan Ronaldo aia kum 5-a nuapang Bale hi an duhsak zawk tan tih te pawh a ri chhuak a ni, manto taka hralh theih a nih lai hian hralh duh pawh nise amah thlaktu tura lakluh an tum ni a an sawi Hazard an lakluh theih tak dawn loh avangin Real tan Ronaldo chhuah tir hi mahni lu lak ang vela hlauhawm a ni. Kum 31 tling pawh nise Ronaldo aia tha player hi an awm nih pawhin pakhat bak a awm kher lo ang. United tan an fapa tlanbo koh kir a harsat phah hle ngei ang.
United tan player an duh lakluh theih dawn loh mahse tun hnai season thum chhunga an player tha ber tih ngam Goalkeeper De Gea an chelh theih phah dawn avangin lawmna tur an nei tho a tih theih awm e. Kum 25-na hmang mek Spanish shot-stopper tan an khaw lama let lehna kawng a awm lo a ni ber mai. Tun nipui transfer khan De Gea hian Real a zawm teuh hle a, paper work fel loh vang chauhin a zawm lo kan ti thei ang. United tan tunlai goalkeeper tha ber, a nih loh pawhin tha ber pawl an kawlzui thei tur hi player thar lei tluk zet a ni awm e.
United-in insiamthat tum viau mahse an game ninawm zet an khelh chhunzawm zel a, Atletico Madrid player tha Saul leh Griezmann te hmanga siam that tum mahse an thil tum hi a thleng lo turah a ngaih theih tawh awm e. A.Madrid tan an player tha hralh chhuah a player tha an lakluh ve theih si loh chuan tlakchhiat tanna a ni thei tlat a ni.