M28 Football Academy chuan hmasawn zawka kepen tumin hostel an din a, School Education Director Pi Lalzarmawii, IAS chuan dinhmun sang tak thleng ngei turin a hawng.

Nilainiah Govt Aizawl High School, Republic Vengah hawnna inkhawm buatsaih a ni a, khuallian Pi Zari chuan nikumah M28 Football Academy din a ni a, kuminah khaw hrang hrang atangin mi 31 an lut a, tih tak zeta kalpui a nih avangin lawmawm a tihzia a sawi.

School behchhana din he academy hi thui tak thleng tura inbuatsaih sauh sauh turin a fuih. Sang tak an thlen theih ngei a ring tih sawiin session thar leh hostel thar a hawng a, ball a pe tel nghal a ni.

Mizo zinga professional football-a sulsutu S Malsawmtluanga hmingchawia din a ni a, Govt Aizawl High School leh Govt Republic Middle School behchhana kalpui a ni.

Session khat an hmang zo tawh a, mi 28 lutin tun session tharah hian 31 ziah luh tawh an ni. Heng zinga 22 hi hostel-ah an awm a, hostel hi Academy Board Chairman leh Govt Aizawl High School Headmaster Pu Lalrawngbawla hmalaknain an din a, kawng tinrengah hma an sawn phah ngei an beisei.

Academy neitu zinga mi, Mizo footballer lar Mama chuan tih tur tam tak a awm a, tunah eng mah lo ang la ni mah se thil lian tham tak thlen turin khawthlir an nei a, Mizo hming a dam chhunga awm turin ngaihtuahna an hmang tih a sawi.

School kal hun pangngai zing dar 9 atanga tlai dar 2 thlengin academy naupangten leh an zir hnuah AFC C Licence coach kaihruainain Republic field-ah tlai dar 2 atanga dar 4 thleng football an zir a, nikum lamah hlawhtlinna an hnutchhiah nghal tawh a ni.

Academy din a nih atanga school session an hman hmasak berah Mizoram Under 15 league khelin pangana an ni a, Mizoram School Games leh Reliance Cup-ah an tel bawk a, Mizoram state team hrang hrangah an zirlai paruk an tel bawk a ni.