French club Lyon president Jean-Michel Aulas chuan an player pahnih Nabil Fekir leh Tanguy Ndombele-te chu an phu dawrna an hmuh chuan chhuah tir an hreh lo niin a sawi.

Lyon captain Fekir hi nikum khan Liverpool chuan an lei chhuak teuh hle a, mahse rokhawlhna a awm leh tak avangin Lyon-ah a cham chhunzawm. Ndombele hi tun nipui chhungin Tottenham-in an dawr ngawrh hle a, mahse club hnihte inkarah inremna engmah a la awm lo bawk.

Aulas chuan, “Fekir hi chuan chhuah a duh a, chuvang chuan dawrtu an awm phawt chuan thingpui sen hang in paha titipui kan hre hauh lo. Tunah rih chuan chanchinthar a awm lova, a mah dawrtu an awm dawn niin a langa mahse tunah chuan engmah a la awm rih lo.

“Tanguy Ndombele chungchangah pawh thutlukna siam engmah a la awm lova, dawrtu an tam a mahse a phu tawk dawrna kan la hmu lo a ni,” a ti.

Lyon hian an left back Ferland Mendy chu Real Madrid hnenah an hralh tawh a, Fekir leh Ndombele-te an chan leh a nih chuan player an in lakluh ve nual a ngai dawn. Tunah hian Brazilian left-back Filipe Luis nen sawi zawm an ni meka, Lyon hian Mendy thlaktu atan free-agent ni mek Luis hi an duh.

Aulas chuan Luis chungchang sawiin, “Keimahni lam rawn awn zingah chuan Luis hi a tha ber a, tun hnai mai khan kan inhmu a mahse inremna erawh a la awm thuai dawn lo. Thutlukna siam vut vut a duh lova, July thlaa Copa America a zawh hma chuan engmah a thleng lovang,” a ti bawk a ni.