Indian Super League player S. Lalhrezuala chu Lunglei District Football Association, Technical Sub-Committee chuan an hnuaia khel duh lo nia ngaiin, anmahni thuneihna huamchhunga tournament vawi hnih khelh an phalsak lo a, an hrem thu hi kumin January thla khan an tarlang.
An hrem chhan tak hi a nihna takah chuan hremna lekna tur pawh niin a lang lo a. Lunglei DFA-in tournament khel tura a tirh lai hian, District Football Association khaikhawmtu Mizoram Football Association tirha tournament dang a khelh vang a ni ber.
Hremna lekna tur niin a lang lo, hrem chhan tur engmah a awm lo. Mizoram Professional Footballers Association pawhin LDFA hnenah hremna hlip turin an ngensak a, MFA lam pawhin LDFA hi Zuala hremna hlip turin lehkha an thawn bawk, mahse LDFA chuan hremna hlip ta loin, a kal tlangpui chhunzawm ta zel zawk a ni.
Bodousa Cup 2022-ah khan Assam State-a fehchhuak turin MFA chuan Lunglei DFA leh Hnahthial DFA te chu team tir turin a ti. Hetah hian Lunglei DFA chuan ISL Club Odisha FC player Zuala Sailung chu team-ah a ko. Club-a contract nei lai a nih avangin club phalna lak hmasak a nih loh chuan a khelh a rem loh thu a sawi. Lunglei DFA hian an tournament khelh tura Zuala a khelh ve theih nan, Odisha FC hnenah dilna a thlen ta lem lo.
Bodousa Cup 2022 neih a nih laiin North East Olympics Games 2022 chu neih a ni ve bawk a. Heta Mizoram aiawh tur hian Zuala hi koh a ni ve leh a, MFA hnenah contract nei lai a nih avanga club hnena khelh phalsak dilna thlen hmasak a ngaih thu a sawi leh. Hei hi Professional player zawng zawng te sawi dan a ni ziah bawk a.
Mizoram Football Association chuan Odisha FC hnenah dilna an thlen a, anni chuan an lo phalsak hlauh mai. MFA tirh Mizoram State aiawhin Zuala chu a fehchhuak ta zawk a. Mizoram captain ni chungin a champion-pui nghe nghe a ni.
Anmahni District team-a a tel loh avangin Lunglei DFA hian Zuala chungah hremna an lek ta a ni ber mai. Lunglei District huamchhunga inkhel thei lo tura hrem a ni hi Zuala tan chuan thil pawi lutuk a ni kher lo ang, a eizawnna pawh a nghawng hauh lo ang. Chutih laiin thiam lohna nei miah lo hetia hrem a ni hi; a player puite chuan na an tihpui a, LDFA hnenah hremna hlip turin an ngen, MFA lam pawhin LDFA hnenah ngenna an siam bawk.
Chuti chung chuan LDFA chuan hremna an hlip duh ta lo a, MPFA chuan Zuala thlavang hauhin Press Release an siam ta a ni.
Mizo player pakhat kha MFA-in an team-a tel turin ko se, chutih laiin India team-in ko bawk se, India team tana khel turin club-in phalsak ta se. India team tana a fehchhuak chu MFA lamin lo hrem ta daih bawk se, chutiang deuh chu Zuala hremna chungchang hi a ni kan ti thei awm e.
Hremna hi a na emaw, na lo emaw, hremna lekna tur chi niin a lang lo a ni.
