Nizan khan Goodison Park-ah Arsenal chuan Everton an hneh lova. Arsenal hian game 13 lai a zawnin hneh loh an tawng lo, Premier League tan nia an tlawm hnuah a vawi khat nan an tlawm ta a ni.

Everton hian 2-1 in hnehna an chang a. 20 mins-ah Sanchez chuan free kick atangin goal a khung a, Alexis Sanchez hi Premier League game hnuhnung 27 atangin goal 27-ah a inhnamhnawih, goal 19 a khung bakah assists vawi 8 a nei a ni.

First half tawp dawnah mual veilam sir atanga Leighton Baines cross chu Coleman chuan Everton si phurh rul nan hmangin a tauh goal a. Hun tawp dawn minute 4 a la awm tihin Williams chuan corner atangin a tauh goal leh a, he goal hi Everton chuan an chakpui ta a ni. Hun tawp dawn tak tak 90+3 mins-ah captain Jagielka chuan yellow card pahnihna chawiin hnawhchhuah a ni a, Merseyside derby-ah a hmel kan hmu thei dawn ta lo a ni.

He match-ah hian Arsenal attaking dangtu Senegalese defensive midfielder Idrissa Gueye a khel tha hle a, man of the match atan thlan a ni nghe nghe. Arsenal hian hnehna chang ngat selang chuan chuan League hmahruaitu an ni dawn a, zanin hian Chelsea chuan Sunderland an hneh a nih chuan point 6-in Chelsea lakah an fal tawh dawn tihna a ni.

Inkhelh zawhah Arsenal manager Arsene Wenger chuan, "Chak lo tur kan niin ka hre lo. Tauh goal vawi hnih kan tuar, goal hmasa zawk kha chu kan thiam loh liau liau a ni a.

"Romelu Lukaku kan veng hneh hle, mahse kan chan loh khanah defender pahnihin goal an khung. Anni tan khan kawng kan hawng zau bawk em a ni. Tin, Cup game khelh angin an zawng zawngin an khel bawk a ni.

"Inkhel thunun hle mah ila tlarhnung an veng hneh em a ni. Chance pawh kan insiam nual, chutih laiin kan insiam tam em em lo, theihtawp chu kan chhuah, kan zawng zawngin kan khel a, mahse a chak lo zawka kan tang ta erawh a hrehawm kan ti hle a ni," tiin a sawi.

Pictures credit : Reuters