Kum 1991, December khaw vawt tak hnuaiah chuan chu putar chak tawhlo tak chuan tuk danga a tih thin ang bawkin a ran rual te chu tlang lamah a khalh chho a. Mahse nidang anglo takin chumi tuk chuan an inlamah a rawn letleh ta hauhlo mai.
Patling rual, police uniform ha in an man hlauh mai. Police an ni tak tak em tih erawh hriat chian nilo mahse chu chuan awmzia a nei hranlo. An khuaah chuan dan ziak aiin silai in thunneihna a chang sang zawk tlat si a. Rorelna chu silai kawltute kutah a awm tlat a ni.
Chu putar chuan thil tihsual a nei hranlo. An manna chhan chu amah mantute ang anihlohna chu a ni. Pawnlam mi, mihrang a ni tlat. Ama thiltih nilovin ama nihna vang zawka suala puh a ni. Ani chu Croatian mi a ni a, anni erawh Serbian an ni tlat si. Chu an danglamna chuan thil engkim a hril vek mai a ni.
A mantute chuan an mi man dang mi engemawzat nen an khaw thenawm, Jesenice ah an hruai a, an lu an tan sak ta a ni. Chu putar chuan a hmangaih em em chhungkua a kalsan a. A chhungte zinga a hmangaih ber leh a thihna tuar bertu chu a tupa kum 6 mi, a hming tawmpuitu chu a ni. An putu chu awmdun chawt thin an ni , a pu in a theihtawpin a duat a , naupang chuan a rilru zawng zawngin a pu chu a ngaisangin a hmangaih bawk a.
An putu a an hming intawm chu Luka Modric a ni. Zanin hian chu naupang, inrikrapna leh tharum hluarna hmuna seilian chuan an ram, Croatia chu khawvela ennawm ropui ber, World Cup final a khelhpui dawn a ni.
Football hian indona tawngkam a hmang nasa hle a- strike, shot, volley, tacks, defence tihte. Tawngkam inang hmang ni mahse Modric hian an ram mipuite ang bawkin indona tak tak awmzia leh football chu a danglamna a hrechiang hle. Tin, Croatia ramah chuan a inang reng a, engkim hi indona kaihhnawih vek a ni thin tih a hrechiang bawk.
Rawng taka a pu thah anih hnu hian Modric te chhungkaw chenna in chu halral vek a ni a, an neih zawng zawng meivapah a chang zo a. Kum engemaw zat chhung chu Zadar khuaa hotel nuam lemlo, tawng chhe ve tawh takah an khawsak a ngaih phah a. An chenna hotel bang thawm that a ngaih avanga inchhunga awm a remloh chang tamtak a awm thin a, chung hunah te chuan mipa naupang Modric chuan hotel parking lot a football khelin a hun a hmang ral thin a ni. A han thanglian a, football tui viau mahse an local team Hajduk Spilt a khel pha tur chuan a pumrua a te mah mah a ni.
Kum 18 a tlinin Bosnian- Hercegovinan league ah Zrinjski Mosta tan a khel a. Chutah chiah chuan a teammate te leh lehlam pawlin thil inang hmuhchhuah an nei ta- chu player lian lemlo tak, chawrche ang taka lang chuan midang zawng aiin football thiamna a nei tha a, tin, amah a inenkawl hneh hle bawk a ni tih hi.
Real Madrid a thlen hmaa a harsatna tawh tamtakte chu sawisen a nilo ang. Amaherawhchu, heng harsatnate hi a inkhelh thiamna leh football a hmangaihna in a hneh zel a. A talent tha tak tak zinga ropui ber chu midang tha taka khelh tir a thiam hi a ni.
Ho taka ball pass a ngaih pawhin tihmawi kual tum lovin a pass mai a, a teammate ten postion tha zawka awm tura insiamremna hun an mamawh chuan reilote chhung ball a han chelh hlek thin a, midang tihsual thuam mawi pawh a hnehsawh hle a ni.
Football player lar tak tak, khelmual chhunga mi mit la zawng leh an mimal thiamna langsar zawnga khel thinte ang a ni ve lova; football star tamtak chu an teammate te hliah bo zawngin, mimal lansarh tum ranin an khel thin. Modric erawh chutiang a ni ve lo. Hruaitu tha a nihna chhan pakhat chu football hi ama game angin a khel ngai lova, team game angin a khel tlat thin hi a ni.
Field chhunga nat der avanga a lum tawp tawp i hmu ngai lovang, a pet goal chang pawhin lawm avanga kawr a pawh thler i hmu ngai lo ang. Khelmual chhunga lehlam teamte laka lungawilohna a awm pawhin hmel hmuh hrehawm leh thinrimin a che ngailo. Heng thil hi chu Ronaldo, Messi leh Neymar te tihah a dah deuh a ni mahna. An ni chu an haw tawh a, Modric leh a team te chu final khel turin Russia ah an la cham tlat.
A teammate te hian an hrechiang a, an ngaina em em bawk. Denmark nena an inhmachhawn tumin penalty a pet goal lova, a teammate Ivan Rakitic chuan an team ko khawmin, "Ngaithla teh u, Lukita hian vawi duailo buaina ata min tal chhuahpui tawh thin a. Tun hi amah kan rulh let theihna hun tha a ni," tiin a teammate te a fuih a. Croatian footballer te chuan Modric pet goal loh chu mawi takin an rawn thupbo sak a, theihtawp an chhuah a, penalty ah an chak ta a ni.
An ram tana he footballer hlut zia hi hriatfiah zawh rual a nilo. English football history a thlalak lar ber chu Bobby Moore- an World Cup trophy a chawi lai kha a ni. Croatia ramah ve thung chuan Zvonimir Boban an khelmual chhunga intihbuaina a police pakhat a fly kick lai thlalak a lar ber thung. Hei hian an ram dinhmun a sawi chiang hle.
1990s chho vel hi Croatia in Yugoslavia atanga independence an ngiat lai a ni a. Dinamo Zagreb leh Red Star Belgrade inkhelh laiin intihbuaina a chhuak a. Boban hian police ho in Dinamo supporter an khawih lai a hmu a, khelmual atanga tlan pheiin kutthlaktu police chu ava bei ta a ni. Boban chuan, "Football star ni mah ila ka hmingthanna, ka nun leh ka football career zawng zawng chan huamin thil pakhat ka ti ngam a, chu chu Croatia ram tan hian a ni," tiin a sawi.
Hemi hnu lawk hian Boban hi Yugoslavia team World Cup squad atanga paih a ni a; kum riat hnuah World Cup ah Croatia team captain niin an ram chu a vawikhatna atan World Cup-ah pathumna a nihpui thei ta a ni. Vawin thlengin Croatian football history ah chuan Slaven Bilic, Robert Prosinecki leh Davor Suker te nen ngaihhlut an la hlawh reng a ni.
Tun kum World Cup ah hian Modric leh a team te hian an an ram history chu bung thar an kaipui a. Team tha ber pawl France an hmachhawn dawn, a tam zawk chuan France an chak an ring ngei ang. Mahse, he ram te takte, la naupang em em, a ram mite pawh indona leh in rikrapna atanga rawn chawr chhuak, engkim dang aia an ram leh hnam hmangaihna dah pawimawh tute hian mi thinlung a hneh a. An captain in ingaitlawm tak chanchin hian rilru a khawih lo theilo a ni. An chak emaw chaklo emaw, an ram mipuite thinlungah chuan hnehtu an va ni dawn chiang em.