Liverpool midfielder hlui Lucas Leiva chuan, lung lama harsatna a neih avangin kum 36 mi niin football khelh a chawlhsan thu a puang.

Leiva chuan, “Ka career neihah khan ka lawm a, khelmual ka mangtha hun a lo thleng ta a, a tulna in min nawr vang a ni. Ka duhna hmunah ka career ka khara, ka duhdan erawh a ni lo. Chawlh loh hram ka tum laiin tih ngaihna dang a awm lova, ka hriselna ka dah hmasak ber a ngai a ni,” tiin inkhelh a chawlhsan chungchang a sawi.

Nikum nipui lai khan Leiva hi a chawr chhuahna Gremio-ah a kir a, Gremio-a test an neihnaah a lung lamah harsatna a neih hi nikum December thla khan hmuhchhuah niin, a tum aia hmain inkhelh a chawlhsan ta a ni.

Liverpool chuan kum 2007 khan pound maktaduai 5 sengin Brazilian defensive midfielder hi Gremio atang hian an lei a, Liverpool-a season sawm a awm chhungin Leiva hian Reds tan game 346 a khel.

Javier Macherano leh Xabi Alonso te chhuah hnuah Leiva hi Liverpool rinrawl a ni chho tan a, Liverpool-a a awm chhung hian English League Cup pakhat a chawi a, Premier League-ah game 247 zet a khel bawk.

Kum 2017 July thla khan Leiva hi Lazio chuan pound maktaduai 5 in Liverpool atang hian an lei chhuaka, Serie A club-a a awm chhung hian Coppa Italia a chawi a, tum hnih ngawt Lazio Player of the Season atana thlan a ni nghe nghe.

Brazil tana vawi 24 inlan Leiva hi nikum June thla khan Gremio-ah kirin, Brazilian club-ah hian kumin December thla thleng contract a ziak a ni.