Tata Motors Zothan Autoworks LPS Pro Fight Title Fight chu October ni 15, Inrinni zan khan R Dengthuama Indoor Stadium, Mualpui-ah khelh zawh a ni a. Mipui 4500 zetin Title Fight hi an an en a, Hall chhungah mipui an khat hneh hle a ni.
LIGHTFLY:- NT Lalbiakkima (Siaha) bt Lalthanga (Bungkawng Vengthar) = Technical knockout (Round 1:34)
Rei an inbeih hmain Bungkawn Vengthar boxer Lalthanga'n Biakkima a tauh a, a mitko ding lam kakin Siaha fighter hnar a thi ve thung. Title Fight-a hmachhawn vawi khatnaah Lalthanga a vanduai a, thisen chhuak nasa avangin a khelh zawm thei lo. An inbeih chhungin champion lai Biakkima a langsar hman. Kut rang leh hnek chhuak tam zawk niin tha takin a khel a, Lalthanga'n chet a harsat. A vawi hnih nan Biakkima'n title-a humhim a, lightfly-a tum tum champion zawn hmasa ber leh vawi khat aia tam champion thei awm chhun a ni zui ta a ni.
Biakkima hian 2014 atangin Pro Fight a khel a, Laldinmawia kut atangin title-a laksak nghal. 2015-ah Lalrinsanga Tlau hneh lehin kawnghren a kawl chhunzawm a, a khelh tawhah a la chak fai vek bawk a ni.
BANTAM:-Zonuntluanga (Dinthar) bt HC Lalramfela (Bawngkawn) = Unanimous decision (40-35, 40-35, 40-35)
Dinthar fighter Tetea a che tha hle, round khatnaah hneh takin a nuai nghal. Rang taka a hnek zawn hnuah champion lai Ramfela chu talbuaiin a tlu a, referee C Vanlalchhuanga'n a chhiar hnuah bei zui lehin Bawngkawn boxer Ramfela a che sual nawnduh lo. Mar tha taka dinglam hnek chhuah hmangin Tetea tan buaina a siam sak a, fei takin champion lai dingtluan mahse, hnehna kawnga kir leh tur khawpin a inlan zo lo.
Round hmasa ber angin Tetea a langsar zui lo na a, rang leh ngil taka a hnek chhuah tha tak leh inhnaihchilha hnek dik leh tam zawk a nihna hmangin thuneihna a chang tluan a, Title Fight-a hmachhawn hmasak berah phu takin Tetea a champion-a, bantam title la thei pangana niin Roro Polymers Best Boxer-a thlan a ni nghal bawk.
Ramfela erawh Vanlalhruaia leh Michael Zodinpuiate ang bawkin title humhim tuma a inlan hmasak berah a tlawm a, 2010 leh 2014 champion Lalnunhlua bak bantam-a vawi hnih champion thei an la awm lo.
LightFly:- Hmeichhiaa Vanlalduati (Khawbung) bt R Lalruatfeli (Edenthar) = Unanimous decision (39-37, 39-37, 39-37)
Duati'n tawn hriat leh thiamna a neih thar hmangin, thahrui nei leh tlo tak Ruatfeli lakah inhnek tam zawk thunun phu takin a chak a, flyweight champion hmasa ber a ni. Duati'n thiamna a hmang tam a, awmze neiin a vai chhuak tam bawk. Ruatfeli'n awlsam taka a tumpui hneh zelin Title Fight a hmachhawn a, inhnek khirh leh hautak a hmachhawn hmasak berah a insiam rem zo lo va, a tawp rat thlengin thawkrim mah se awmzia a nei zo lo.
LIGHT:- Hmeichhiaa Lalbuatsaihi (Tuithiang) bt Lalhriatpui Jahau (Champhai Vengthar) = Unanimous decision (40-36, 39-37, 40-36)
Hun pawimawhah Buati'n boxer tha a nihna a lantir a, boruak sang leh mipui ri hulh hulh karah Hriatpuii'n beisei a pha lo ve thung. A khelh hnuhnun vawi hnihah Buati'n inhnial theih leh inhnehtawk takin hnehna a chang hram ve ve. Rin a hlawh zo lo va, Hriatpuii'n Title Fight hmasa ber khel tura a kalkawngah fiahna tling a hmachhawn lo ve thung.
Tawn hriat nei tha Buati'n a chet that ber hun hmangin inhnek a thunun hneh hle a, a hnek dikin a hnek chhuak tam a, a tawp thlengin thahrui a nei tha hle bawk. Kum 17 mi Hriatpuii erawh fiahna hmaah a ruh a la no deuh a, a ralthuam tha ber ngil taka a vei leh ding dik tak taka a hnek chhuah thin ang kha Buati hmaah a puitlin hlei thei lo va, a talbuai. Hmeichhe boxing telh a nih vawi khatna, Title Fight hmasa berah beiseiawm Hriatpui'n an inhnek hnuhnun bera a hneh tawh international boxer Buati a tum dawn.
LIGHT:- Anthony Lalduhawma (Govt Complex) bt Lalmuanpuia (Khatla) = Jury decision (37-39, 39-37, 38-38)
Pro Fight a khelh tawh chhunga a derthawn ber ni mah se Anthony-a'n hnehna hlu leh chhinchhiahtlak a chang a, Muanpuia lakah vawi thum chak zawnin a tum thum nan a champion. Lightweight-ah champion thei mi pahnih chiah an awm a, kum nga hnuah title chuhin an innuai. Champion lai Muanpuia'n hmasawnin tha taka inveng chungin rang leh dik zetin a hnek let thei. Mahse, chhiatpui thamin Anthony-a a la hnungtawlh lo.
Inringtawk takin thiamna hmuhnawm a lantir a, a hmaa an insut tawh zawng aiin chak duhin a sahal tih a entir bawk. A nawrtu leh hnek chhuak tam zawk a ni a, tharum nei zawk a ni bawk a, a thawhrimna a chakpui hram. Round li an inbeih chhungin judge point pekah an inhnehtawk. Judge pakhat ve vein 39-37 in an chaktir a, pakhatin 38-38 a pe. Pro Fight dan hman mekah chak zawk an awm ngei ngei a ngai a, jury-in thutlukna siamin mittlung zawka an ngaih Anthony-a an chak tir ta a ni.
Hall chhunga mipui 4500 vel pungkhawmin Mizo boxing chanchina hriat zui hlawh tur inhnek hmuhnawm an en. Anthony-a thiamna nge Muanpuia kut rang leh dik chungnung tih chu a tir atanga a tawp thlenga zawhna chhan harsa tak a ni tluan. Pro Fight-a a hneh thei loh Anthony-a hmaah hnehna ban a phar theihna hun tha ber a ni tih Muanpuia'n hre mahse, Title Fight vawi ruk neih tawha inlan kim awm chhun Muanpuia chungah a na thei ang bera vanduaina a thleng. 2014 khan title humhim turin Anthony-a a inlan thei lo va, kawnghren a hloh.
2011 hnua Pro Fight a khelh leh hmasak berah Govt Complex fapa rangkachak hi vawi ruk chak zawnin a champion. 2010 atangin Pro Fight a khel tan a, vawi 12 inhnek tawhin tlawm a la nei lo. 2010 leh 2011 khan Title Fight-ah Muanpuia hneh zawnin Anthony-a a champion tawh a, a hma aiin tun tuma a chakna hi atan a hlu zual a, a lawmawm a, a ropui bik tih a chiang a, Muanpuia champion zat nih rualin a vawi thum nan kawnghren a hreng.
MIDDLE:- Zarzoliana (Sawleng) bt C Lalduhawma (Leitan) = Knockout (Round 3, minute 1:20)
2010 leh 2011 champion Zotea'n middleweight fighter ropui a nihzia a nemnghet nawn leh a, round thumnaah C Lalduhawma knockout-in vawi thum champion thei hmasa ber a ni nghal. Veikhawr ve ve intawngin Zotea vei lam a hlauhawm a, tum danga thiltithei Duhawma vei lam a lang tham lo. Sawleng chhuantawlawlin a tir atangin a awpbet a, Title Fight a khelh hmasak berah invengin Duhawma a tawlh kual a, round thumnaah vawi hnih tluin Zotea kut tuar lovin a vawi hnihnaah a bei zui thei tawh lo.
Middleweight telh a nih tan kum 2010 khan chiang takin Assam Regiment boxer Zotea a champion. 2011-ah champion nawn lehin takin 2014 Title Fight-ah Johnkenty HC Vanhlimpuia nen an intawngin a, a mitko a tauh kak. Thisen chhuak nasa avangin a khel tluan thei lova rilru na takin title a hloh. Nikumah awlin kuminah hruihrual chhungah a kir leh a, hneh a duh ber 2014 leh 2015 champion Vana'n title a kalsan a, lightheavy-ah a insawn avangin an intawng nawn thei lo. Zotea'n tum tawk a hmu lo va, title a lak kir leh chhungin vawi li a inhnekah a khingpui hnek tlu vekin mi pathum a knockout a ni.
LIGHTHEAVY:- Johnkenty HC Vanhlimpuia (Tuipui) bt PC Lalmuankima (Saron Veng) = Knockout (Round 2, minute 1:46)
Lightheavy-a a inlan hmasak berah Vana a vawklallen. Round hnihna laihawlah champion lai PC Lalmuankima a knockout a, Pro Fight record ropui leh danglam siamin weight hrang pahniha champion hmasa ber a ni. Kum 20 mi Vana hian 2014 leh 2015 middleweight title la zawnin weight rit zawkah a in sawn a ni.
Thiamna tha tak a neih bakah lightheavy boxer zinga kut rang leh thothang tha a nih bakah hnek na tak a nih bawk avangin tute mah round thum ding tluan zo an awm lo. Chungnung taka a chak rualin Vana'n Haier D3 Fighter of the Night lawmman a dawng. Lightheavy-a vawi li a khelhah a tumpui knockout vekin chiang takin a champion. Middle Title Fight vawi hnih a hmachhawn tawhah a tumpui an inhliam ve ve a, khel tluan lo zelin a chak. Vawi thum a champion tawhah round li khel tling lo vekin 'Title Fight'-ah hnehna a chang.
Muankima tan mualphona nasa tak a ni ve thung. 2014 khan a vawi khat nan Title Fight hmachhawnin a che tha hman hle. Mahse, round linaah champion lai Abel Lalawmawia'n a knockout a, 2015-ah Abela laka a tlawmna chhang letin champion mah se Title Fight vawi thum a hmachhawn tawhah knockout ve vein tum hnih a tlawm.
LAWMMAN:- Mipa
Weight tina champion = Kawnghren, certificate, Rs 40,000 Weight tina pahnihna hian Certificate, Rs 10,000 an dawng thung.
Hmeichhia Weight tina champion = Certificate, Rs 20,000 Weight tina pahnihna hian Certificate, Rs 10,000 an dawng ve bawk.
Roro Polymers Best Boxer: Zonuntluanga (bantam champion) = Roro Polymers tuizem litre 2000, Rs 2000 a dawng.
Roro Polymers Best Referee : R Lalbiaksangi = Roro Polymers tuizem litre 2000, Rs 1000 a dawng.
Roro Polymers Best Judge : Lalchhanhima Hnamte = Roro Polymers tuizem litre 2000, Rs 1000 a dawng.