19 Dec 2015 06:31

PC Lala

inkhel correspondent and photographer

LPS Pro Fight Title Fight zawh fel a ni

Samsung 3:16 LPS Pro Fight"Title Fight"chu December 18, 2015 (Zirtawp) zan khan Mizoram State Sports Council Multipurpose Hall, Mualpuiah zawh fel a ni a, NT Lalbiakkima, HC Lalramfela, Lalmuanpuia, Johnkenty Vanhlimpuia leh PC Lalmuankima te chuan an khingpui theuh hneh in LPS Pro Fight Title Fight  Champion an ni ta a ni.  Mipui 1900 in a hmunah hian an chhim a, Title Fight zanah hian Pu Lalsawta, (Finance Minister) chu khual lian a ni.

Lightflyweight-ah Pro Fight kalpui a nih atangin NT Lalbiakkima'n (Siaha)chuan thil thleng ngai lo thlen tirin, a khingpui  Lalrinsanga Tlau (Khawruhlian) chu Unanimous Decision (38-37, 39-36, 38-37) a hnehin, lightfly title humhim hmasa ber a ni a, vawi hnih champion hmasa ber a ni bawk.

Bantamweight-ah HC Lalramfela Chawngtlai  hian a khingpui Lalnunhlua Chaltlang Lili Veng chu Split Decision (39-37, 38-39, 39-37) in a hneh. Fela hian title a lak hmain Pro Fight quarterfinal aia sang a la khel lo va, bantam-a champion thei palina a ni a, ahmain kum 27 mi Hlutea (2010, 2014), Vanlalhruaia (2009) leh Michael Zodinpuia (2011) an champion tawh.

Lightweight-ah Lalmuanpuia Khatla chuan a khingpui Lalrinawma Reiek chu  Unanimous Decision (40-36, 40-36, 40-36) in a hneh.  Khatla boxer Muanpui'n title a humhim rualin light-a vawi thum champion hmasa ber a ni a, 2009 leh 2010-ah phu takin a champion tawh a ni.

Middleweight-ah  Johnkenty Vanhlimpuia Tuipui chuan a khingpui Boris Zoremsiama Sailung Saron Veng chu Round 1-ah Knockout nghal.  Kum 19 mi Johnkenty Vanhlimpuia'n Title Fight rei lo bera hnehna a chan hnuah Zaroliana sulhnu tlukin, kum zawnin a champion a, middle-ah an pahnihin vawi hnih an champion ta a, mi dang champion thei an la awm lo.

Lightheavyweight-ah PC Lalmuankima Saron Veng chuan Abel Lalawmawia chu Unanimous Decision (39-37, 39-37, 40-36) in a hneh. Title Fight a hmachhawn vawi hnihnaah Muankima a chak a, vawi li champion tawh Abel-a hneh hmasa ber a nih rualin lightheavy champion thei pahnihna a ni.

Fighter of the Night - Lalmuanpuia (Khatla)

Zothan Autoworks Best Boxer - HC Lalramfela (Chawngtlai)

RC Shirt House Best Referee - C Vanlalchhuanga

RC Shirt House Best Judge - B Lalhriatpuii

Title Fight-a chakin Rs 40000 an dawn bakah kawnghren leh certificate a dawng.

Title Fight-a chak lovin Rs 10000 bakah Lura Traders hnen atangin boxing thawmhnaw leh hmanrua a dawng.